նախընտրելի դարձնել
Մոսկվայում դատարանը տնային կալանքի է ենթարկել պաշտպանության նախարար Անատոլի Սերդյուկովի պաշտոնանկության պատճառ դարձած «Օբորոնսերվիս» ընկերության գործի գլխավոր մասնակիցներից մեկին՝ Եվգենյա Վասիլեւային: Հենց նա էր սահմանում, թե որ գույքն այլեւս պետք չէ բանակին, հետո շուկայականից բավականին ցածր գներով այդ գույքի վաճառքի որոշում կայացնում: Վասիլեւան մեղքը չի ընդունել։
Եվգենյա Վասիլեւային մեղադրանք են ներկայացրել ՔՕ 159-րդ հոդվածի երրորդ մասով` «Առանձնակի խոշոր չափի խարդախություն»:
Դատարանում հայտնել են, որ Վասիլեւային արգելվում է լքել տարածքը, շփվել շրջապատի հետ՝ բացի պաշտպաններից: Նրան չի թույլատրվում օգտվել կապից, այդ թվում` համացանցից: Վասիլեւան խնդրել է 15 միլիոն ռուբլի գրավի դիմաց ազատել իրեն:
Առաջիկա երկու ամիսը Վասիլեւան կանցկացնի Մոլոչնայա նրբանցքի իր շքեղ 13 սենյականոց բնակարանում, որը խուզարկությունից հետո մի քիչ «աղքատացել է», հաղորդում է vesti.ru-ն:
Այդ ժամանակ առգրավվել էին կես տասնյակ գեղարվեստական կտավներ, այդ թվում՝ ռուս դասականների բնօրինակներ, զարդերի մի ամբողջ թանգարան, ադամանդե քարերով 120 ոսկե մատանի:
«Կոմերսանտը» ուշադրություն է հրավիրում «քննության կողմից մեղադրյալի նկատմամբ լիբերալ վերաբերմունքի վրա»: Քննչական մարմինների աղբյուրներն ակնարկել են, որ Ե. Վասիլեւայի տնային կալանքի վերաբերյալ որոշումը «առաջարկել էին» այլ գերատեսչությունից:
