ԵԱՀԿ Մինսկի խմբի համանախագահները Ռոբերտ Բրատկեն (ԱՄՆ), Իգոր Պոպովը (Ռուսաստան), Ժակ Ֆորը (Ֆրանսիա) եւ ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկը նոյեմբերի 19-26-ը տարածաշրջան կատարած այցի արդյունքների վերաբերյալ հայտարարությամբ են հանդես եկել:

«Երեւանում համանախագահները հանդիպել  են նախագահ Սերժ Սարգսյանի եւ ԱԳՆ-ի ղեկավար Էդվարդ Նալբանդյանի,  Բաքվում` նախագահ Իլհամ Ալիեւի եւ արտգործնախարար Էլմար Մամեդյարովի հետ:

Հայտարարության մեջ նշվում է, որ նոյեմբերի 21-ին եւ 22-ին համանախագահներն այցելել են Լեռնային Ղարաբաղ, որտեղ հանդիպել են դե ֆակտո իշխանությունների հետ եւ այցելել Զանգելանի  եւ Ջաբրայիլի շրջաններ, որպեսզի «գնահատեն իրադրությունն այդ տարածքներում՝ նախորդ՝  2010 թ. հոկտեմբերի այցից հետո»:

«Համանախագահները նախագահներ Սարգսյանի եւ Ալիեւի հետ քննարկել են  օգոստոսին եւ սեպտեմբերին արտգործնախարարներ Էդվարդ Նալբանդյանի եւ Էլմար Մամեդյարովի հետ առանձին հանդիպումների արդյունքները, ինչպես նաեւ խաղաղ գործընթացի շարունակման գաղափարները, որոնք հոկտեմբերի 27-ի համատեղ հանդիպման ընթացքում նրանք ներկայացրել էին նախարարներին: Կողմերը պայմանավորվել էին շարունակել աշխատանքը արտգործնախարարների մակարդակով»,- ասվում է հայտարարության մեջ:

Միջնորդները նաեւ շնորհակալություն են հայտնել  Անջեյ Կասպշիկին եւ նրա թիմին` հրադադարի ռեժիմի դիտարկմանն ուղղված ջանքերի եւ տարածաշրջան իրենց այցը հեշտացնելու համար, մասնավորապես` Զանգելանի եւ Ջաբրայիլի շրջաններ»,- ասվում է հայտարարության մեջ: