Միջազգային վարկանշային Fitch Ratings գործակալությունը Արգենտինայի երկարաժամկետ վարկանիշը «В»-ից կտրուկ նվազեցրել է մինչեւ «СС», կարճաժամկետը` «В»-ից մինչեւ «С», ազգային փոխարժեքի համար` «В»-ից մինչեւ «В-»` բացասական կանխատեսմամբ:

Վարկանշի իջեցման պատճառը գործակալության մտավախությունն է, որ պարտքի մարման պարտավորությունների հետ կապված՝ Արգենտինայում կարող է  «տեխնիկական դեֆոլտ» տեղի ունենալ, որը երկրին ֆինանսական ճգնաժամի կհասցնի:

Արգենտինայի իշխանությունները 2005 եւ 2010թթ.  վերակազմավորել էին 2001թ. սեփական պարտքի մարման համակարգը, որի վճարումներն ընդհատվել էին: Պարտատերերի մի մասը հրաժարվել էր  վերակազմավորումից եւ պահանջել պարտքի ամբողջական մարում: Նախորդ  շաբաթ դատավոր Թոմաս Գրիեսան վճռել էր, որ Արգենտինան պարտավոր է  մինչեւ դեկտեմբերի 15-ը 1,3 միլիարդ դոլար վճարել այն երաշխիքային հիմնադրամին, որն ապահովում է պարտքն ամբողջական ծավալով պահանջողների վճարները, հայտնում է «ՌԻԱ Նովոստին»:

Նոյեմբերի 26-ին Արգենտինան  Գրիեսի վճիռը բողոքարկել էր Նյու Յորքի Բողոքարկիչ դատարանում: Վերակազմավորմանը համաձայնած պարտատերերը եւս բողոքարկել են Գրիեսի որոշումը՝ այն սխալ որակելով։