Վրաստանի պաշտպանության նախարարության լրտեսության մեջ մեղադրվող նախկին սպա, գնդապետ Սերգո Թեթրաձեի մահը բռնի է  եղել, հայտնել է երկրի գլխավոր դատախազ Արչիլ Քբիլաշվիլին:

Սերգո Թեթրաձեն 2011թ. սեպտեմբերի 19-ին ձերբակալվել եւ նախնական կալանքի էր ենթարկվել: Նույն օրը մահացել էր  №18 բուժհաստատությունում, որտեղ տեղափոխվել էր Գլդանի №8 բանտից:  Ըստ պաշտոնական վարկածի՝ մահվան պատճառը սիրտ-անոթային անբավարարությունը եւ սրտի իշեմիկ հիվանդությունն էին եղել:

Արչիլ Քբիլաշվիլին հայտնել է, որ նոյեմբերի 14-ին դատախազությունը վերսկսել էր Թեթրաձեի մահվան հանգամանքների քննությունը եւ պարզել, որ 2011-ի տվյալները սխալ են, գրում է  «Նովոստի Գռուզիան»:

Նրա խոսքով, վկաներից մեկը՝ Գլդանի №8 բանտի նախկին աշխատակիցը, հայտնել է, որ  ռեժիմի եւ բանտի անվտանգության ծառայության պետերի հրահանգով ինքն ու մեկ այլ բանտարկյալ Սիսաուրին ծեծել են Թեթրաձեին:

 «Նրան 20 րոպե ծեծել են առանձնակի դաժանությամբ, բռնության ենթարկել , տանջել, ինչի հետեւանքով բանտարկյալը կորցրել է գիտակցությունը եւ կես ժամ անց մահացել»,  - ասել է Քբիլաշվիլին: