Հայաստանի նախագահ Սերժ Սարգսյանը նոյեմբերի 30-ին Բրազավիլում տեղի ունեցած ավիավթարի կապակցությամբ ցավակցական հեռագիր է հղել Կոնգոյի Հանրապետության նախագահ Դենիս Սասու Նգուեսոյին և զոհված հայ օդաչուների հարազատներին: Այս մասին NEWS.am-ին հայտնեցին ՀՀ նախագահի մամուլի գրասենյակից:

Նշենք, որ Կոնգոյում վթարի ենթարկված Իլ-76  բեռնատար ինքնաթիռի անձնակազմը, նախնական տեղեկություններով,բաղկացած է եղել 7 հոգուց, որոնցից 5-ը` Հայաստանի քաղաքացիներ են եղել:  Նրանք եղել են օդաչուներ, անձնակազմի այլ անդամներ, որոնք պայմանագրային հիմունքներով աշխատում էին Կոնգոյում: Իլ-76  բեռնատար ինքնաթիռը պատկանել է «AIR Service» ընկերությանը:  Վթարի նախնական պատճառը կայծակն է եղել, որն,ականատեսների վկայությամբ, վնասել է օդանավի թեւը: Դեպքը պատահել է այսօր լուսադեմին` վայրէջք կատարելիս:

Հիշեցնենք, որ Կոնգոյում Իլ-76  բեռնատար ինքնաթիռը բախվել է բնակելի թաղամասին. Զոհվել է 30 մարդ, տուժել` 20-ը: Իլ-76 ինքնաթիռը Կոնգոյի Հանրապետության մայրաքաղաք Բրազավիլ էր թռել  երկրի մեծությամբ երկրորդ Պորտ Նուարա քաղաքից:«Կոմսոմոլսկայա պրավդան», վկայակոչելով AP-ին, հայտնում է, որ ուժեղ քամու եւ վատ եղանակի պատճառով մեքենաներ տեղափոխող ինքնաթիռը չի կարողացել  վայրէջք կատարել մայրաքաղաքի օդանավակայանի թռիչքուղում եւ ընկել է ոչ այնքան հեռու գտնվող բնակելի տների վրա, այնուհետեւ ուժեղ հրդեհ է բռնկվել:

Rbc-ն վկայակոչելով France 24-ին, գրում է, որ վայրէջքի ժամանակ Իլ-76-ը դուրս է եկել թռիչքավայրէջքային ուղուց, բախվել մի քանի բնակելի տների, այնուհետեւ ընկել եւ բռնկվել: Ինքնաթիռի անձնակազմում եղել է չորս մարդ, որոնք մահացել են հարվածից կամ հետեւած հրդեհից: Ավիավթարից անմիջապես հետո Կոնգոյի Հանրապետության մայրաքաղաքի օդանավակայանը փակվել է, իսկ ողբերգության վայրում աշխատում են հրշեջները, փրկարարները եւ ոստիկանությունը: Զոհերի թիվը հասնում է տասնյակների, ըստ վերջին տվյալների` զոհվել է շուրջ 30 մարդ: