ՆախընտրելիNews International մեդիահոլդինգի գործադիր տնօրեն Թոմ Մոքրիջը լքում է պաշտոնը: News Corp ձեռնարկության ղեկավար Ռուպերտ Մերդոքը հայտնել է, որ Մոքրիջի որոշումը «նրա անձնականն է»:
Մոքրիջը Մերդոքի հետ աշխատել է 22 տարի, իսկ 2003թ.-ից ղեկավարել է իտալական շուրջօրյա Sky Italia հեռուստաալիքը, հայտնում է BFM.RU-ն:
Մոքրիջը News International-ը ղեկավարել է 2011թ. The News of the World պարբերականի սկանդալից հետո, որի հետեւանքով պաշտոնից հեռացել էր Ռեբեկա Բրուքսը: Այժմ նրա դեմ պաշտոնական մեղադրանքներ են ներկայացվել ոստիկանական քննությանը խոչընդոտելու, պաշտոնյաներին կաշառելու եւ քաղաքացիների հեռախոսազրույցները գաղտնալսելու համար:
News International-ը ղեկավարում է բրիտանական մի շարք հայտնի թերթեր, մասնավորապես` The Sun-ը եւ The Times-ը: Ըստ BBC News-ի աղբյուրների` մեդիահոլդինգը մտադիր են բաժանել երկու մասի` հեռուստատեսային եւ տպագրական:
