Այս սենսացիան այնքան էլ «թարմ» չէ... Նման կանխատեսումներ միշտ են եղել: Դրան է վերաբերում նաեւ ապոկալիպսիսը, որը խոստանում է մայաների օրացույցը: Այն կազմվել եւ քարերի վրա փորագրվել է դեռեւս մ.թ.ա. VII դարում:

Ի վերջո, սկզբում անհասկանալի նշաները գիտնականները վերծանեցին  եւ  առավել հասկանելի կերպով ներկայացրին հանրությանը: Ինչն էլ, իր հերթին,  նպաստեց հետագայում տարբեր լուրերի տարածմանը, այդ թվում` անհեթեթ:

«Անհեթեթ լուրերի»  առաջին կատալիզատորը դարձավ ամերիկացի հնագետ, Եյլի համալսարանի անթրոպոլոգիայի պրոֆեսոր Մայքլ Կոուի`  «աշխարհի վերջի» մասին զավեշտալի «կանխատեսումը»: Կես դարի առաջ, հանդես գալով համաժողովներից մեկում, գիտնականն ասաց, որ մայաների օրացույցով  2012 թ-ին ավարտվում է  միանգամից երկու փուլ` ավանդական չորսհարյուրամյակն ու 5126 տարվա վիթխարի ցիկլը:

Այսինքն, այս տարվա դեկտեմբերին սպասվում է  ցիկլերի ավարտի ճակատագրական համընկում: Թեեւ գործը կարող է ավարտվել «պարզ» գլոբալ երկրաշարժով, կամ համաշխարհային ջրհեղեղով: Սակայն, անկախ լիկվիդացիայի մեթոդներից, մեր քաղաքակրթությունը դեկտեմբերի 21 –ին կավարտի իր բազմադարյա ուղին...

Աշխարհի վեւրջի մասին կանխատեսումներ քիչ չեն եղել.  գրեթե բոլոր ժողովուրդների մոտ եւ բոլոր ժամանակներում: «Աշխարհի վերջի»  վերջին սպասումները միլենիումի`  նոր հազարամյակի հետ էին կապված:  Ի դեպ, թե որ տարին պետք է լինի II հազրամյակի վերջին տարին, այն ժամանակվա աժիոտաժի մեջ այդպես էլ չհստակեցվեց:

Բայց քանի  որ «աշխարհի վերջը»  վրա չհասավ, այն «տեղափոխվեց» հաջորդ տարիների վրա: Այդ կանխատեսումների ձախողումից հետո  համաշխարհային հանրությունը մի փոքր հանգստացավ  մինչեւ նոր «աշխարհի վերջի» մասին հայտարարությունները, այս անգամ ` մայաների օրացույցով:

Սակայն զանգվածային աղետներ միշտ էլ եղել են, եւ ոչ միայն վերջին տարիներին:  Օրինակ, 1138 թ. Սիրիայում երկրաշարժի ժամանակ զոհվել էր 230 հազ. մարդ, իսկ XIV դ. Եվրոպայում ժանտախտի համաճարակի ժամանակ` մոտ 75 մլն մարդ:

…Բնականաբար սրամիտներն անուշադրության չեն մատնել այնպիսի նշանակալի իրադարձությունը, ինչպիսին «աշխարհի վերջն է», եւ համացանցը ողողված է թեմայի հետ կապված  նկարների ու անեկդոտների շարքերով:  Այսպես ուրախ անցկացնելով,  մոտենում ենք ճակատգրական օրվան...Իհարկե, ծիծաղելի կլինի ամեն ինչ լուրջ ընդունել, սակայն անքննելի են գործերն Աստծո...

Ալբերտ Խաչատրյան