Էքստրեմալ սպորտի «Ադրենալին» ասոցիացիան «ԱրմենՏել» ընկերության (ապրանքանիշը` Beeline) աջակցությամբ կազմակերպում է  արտաճանապարհային մեքենաների Jeep Trial կարգի միջազգային բաց մրցարշավ: «Զանգեզուր Extreme 2012» խորագրով մրցույթը տեղի կունենա դեկտեմբերի 16-ին Սյունիքի մարզի Կապան քաղաքում:

Մասնակիցները կհաղթահարեն արհեստական եւ բնական խոչընդոտներով դժվար անցանելի ճանապարհներ: Մրցուղու հատվածներից մեկը նախատեսում է ավտովերհանի կիրառում: Հաղթող կճանաչվեն այն մարզիկները, որոնք ամենաարագ կհաղթահարեն մրցուղին` նվազագույն տուգանային միավորներով:

«Առաջիկա մրցույթով մենք ամփոփում ենք 2012 թ-ի արտաճանապարհային մեքենաների Էքստրեմալ սպորտաձեւի աշուն-ձմեռ մրցաշարը:  «Ադրենալին» ասոցիացիայի հետ մեկ տարվա համագործակցության շրջանակում կաղզմակերպվել է Էքստրեմալ մարզաձեւերի 10 մրցույթ: «Զանգեզուր Extreme 2012» մրցույթը կդառնա Հայաստանի մարզերում կազմակերպված 5-րդ միջոցառումը: «ԱրմենՏել» ընկերությունն իր կորպորատիվ սոցիալական ռազմավարության շրջանակում ձգտում է հավասարապես աջակցել երիտասարդկան ծրագրերին ինչպես մայրաքաղաքում, այնպես էլ մարզերում:  Կապանում մրցույթը կանցկացվի առաջին անգամ եւ մենք վստահ ենք, որ կբաձրացնենք Էքստրեմալ մարզաձեւերի հանդեպ Սյունիքի մարզի երիտասարդների հետաքրքրվածությունը, դարձնելով հետագա մրցույթներն ավելի վառ, գունեղ եւ հետաքրքիր», - նշեց «ԱրմենՏել» ՓԲԸ Գլխավոր տնօրեն Իգոր Կլիմկոն:

«Հավատարիմ մնալով մեր սկզբունքներին, «Ադրենալին»  էքստրեմալ սպորտաձեւերի Ֆեդերացիան ավելի ու ավելի հաճախ է միջոցառումներ կազմակերպում ՀՀ մարզերում, բացահայտում նոր տաղանդներ  եւ  սպորտի մեծ պոտենցիալ ունեցող երիտասարդներ, հնարավորություն է տալիս ինքնադրսեւորվելու եւ ինչու ոչ, հետագայում տարբեր միջազգային մրցուղիներում Հայաստանը ներկայացնելու: Նաեւ մեր հաջողությունների մասին է խոսում այն փաստը, որ Ադրենալինի կողմից կազմակերպված բոլոր միջոցառումներին մասնակցելու համար Հայաստան են գալիս մարզիկներ Վրաստանից, Ռուսաստանից եւ Իրանից», - նշեց Հայաստանի Էքստրեմալ սպորտի «Ադրենալին» ասոցիացիայի նախագահ Արտաշես Ստեփանյանը:

Մրցույթին մասնակցելու համար հրավիրված են մարզիկներ Իրանից եւ Վրաստանից: Պրոֆեսիոնալ մարզիկների հետ միասին, ուժերը չափելու հնարավորություն կունենան նաեւ բոլոր ցանկացողները, ովքեր կհամապատասխանեն կանոնակարգի պահանջներին: Մանրամասների գրանցումը բաց է` «Ադրենալին» ասոցիացիայի 010228085  հեռախոսահամարով կամ ք. Կապան, Ռաֆայել Մինասյանի փ. 14 հասցեով: