Ընթացիկ տարվա հունվար-հոկտեմբերին ամսական միջին անվանական աշխատավարձի եւ ընդհանուր գնաճի միջեւ դրական հարաբերակցություն է արձանագրվել` 105,1%`  102,4%-ի դիմաց: Սակայն ուրախության առիթ առանձնապես չկա, եթե դիտարկենք կարեւոր ապրանքների եւ ծառայությունների գների դինամիկան:

Ընթացիկ տարվա նոյեմբերին, նախորդ տարվա նույն ժամանակահատվածի համեմատ, սպառողական գների ինդեքսը կազմել է  103,6%, այդ թվում` պարենային ապրանքների մասով` 103,8%, ալկոհոլային խմիչքների եւ ծխախոտի մասով` 104,6%: Ապրանքների եւ ծառայությունների խմբում  աճ է արձանագրվել բժշկական ծառայությունների եւ դեղորայքի բնագավառում` միջինը 7,8%-ով:

Հայտնի է, որ մեր հասարակության աղքատ շերտերի բյուջեի հիմնական մասը ծախսվում է  սննդամթերքի եւ, հատկապես, հացի վրա: Հարկ է նշել, որ այս մթերքը մայրաքաղաքում մեկ տարվա ընթացքում թանկացել է  կիլոգրամի դիմաց 39,5 դրամով կամ 8,6%-ով:

Նոր տարին սարերի ետեւում չէ,  եւ շատ ընտանիքներ սկսում են ավանդական առեւտուրը: Նոյեմբերին մայրաքաղաքում խոզի մսի մանրածախ գինը, նախորդ տարվա նույն ժամանակահատվածի համեմատ աճել է 8,8%-ով: Այնպես որ, շուտով ավանդական «բդի» գինը շուկայում նոր թռիչք կունենա... Գնորդներին թերեւս մի փոքր կմխիթարի տավարի մսի գինը, որը  նշված ժամանակահատվածում նվազել է 5,4%-ով: Իսկ ահա համեմամտաբար էժան հավի միս նախընտրողներն ստիպված կլինեն  կիլոգրամի դիմաց 225 դրամ կամ  25,9% ավելի վճարել:

Տոնական սեղանն անիմաստ է առանց խմիչքի, հատկապես` ալկոհոլի: Տեղական արտադրության օղու գինը մնացել է նույն մակարդակին, ինչ նախորդ տարի: Սակայն հայտնի է, որ մեծ պահանջարկ է վայելում նաեւ ներմուծվող արտադրանքը: Նոյեմբերին նշված խմիչքի սիրահարները ստիպված են եղել 3-9% ավելի վճարել, քան նախորդ տարի: Հայրենական կոնյակը եւս մեկ տարվա ընթացքում հասցրել է թանկանալ. երեքաստղանի «Արարատը» թանկացել է 10,0%-ով, «Ընտիրը»` 11,3%-ով, «ՄԱՊ»-ն ու «Պռոշյանը»` 10,6%-ով: Ոչ ալկոհոլային խմիչքների մանրածախ գները եւս աճել են 5,3-14,8%-ով:

Ինչ վերաբերում է ազգային ուտեստին` խաշին,  ապա նրա հիմնական բաղադրիչի` տավարի տոտիկի հարցում եւս զգալի աճ է արձանագրվել`  48,0%:  Խաշի մեկ այլ պարտադիր մաս` լավաշը, թանկացել է 6,5%-ով:

Այնպես որ, գների առումով  նոյեմբերի ցուցանիշներն առանձնապես լավատեսություն չեն ներշնչում: Եւ այն էլ Նոր տարվա նախաշեմին, երբ գներն աճում են ոչ թե օրերի,  այլ ժամերի ընթացքում...