Անկախ Հայաստանի պատմության մեջ առաջին անգամ նախագահական ընտրությունները կանցնեն ոչ թե քաղաքական էլիտայի ներկայացուցիչների պայքարի մակարդակով, այլ միավորումների եւ կոալիցիայի ձեւավորման, որն արդեն կարելի է դրական առաջընթաց համարել:  Այդ մասին այսօր՝ դեկտեմբերի 11-ին կայացած մամուլի ասուլիսում նշել է քաղաքագետ Սերգեյ Մինասյանը:

Անդրադառնալով«Բարգավաճ Հայաստան» կուսակցության առաջնորդ Գագիկ Ծառուկյանի որոշումների վրա ազդող արտաքին եւ ներքին գործոններին՝  քաղաքագետը նշել է, որ  արտաքին գործոնները, բնականաբար, ոչ մի նշանակություն չունեն, իսկ ներքիններից կարելի է ընդգծել բուն կուսացության հետագա գոյության հարցը:  «Չեմ կարծում, թե Գագիկ Ծառուկյանը թույլ կտա, որ «Բարգավաճ Հայաստանը» վերածվի «Օրինաց երկրի»: Կարող են  տեղ գտնել նաեւ ուժային, վարչական գործոններ, որոնք նրան ստիպեն չառաջադրել թեկնածությունը: Ներքաղաքական իրավիճակի զարգացումներում  հնարավոր են բոլոր սցենարները, եւ դրանք ավելի շատ պայմանավորված են ներքաղաքական ուժերի բաշխմամբ, քան արտաքին քաղաքական ճնշմամբ», - ասել է փորձագետը:

Նա նաեւ հավելել է, որ երկրի արտաքին քաղաքականության մեջ ոչ մի կարեւոր փոփոխություն չի լինի, քանի որ նախագահի հավանական թեկնածուների արտաքին քաղաքական մոտեցումներն էականորեն չեն տարբերվում: «Հայաստանը ուժային բոլոր կենտրոնների հետ կպահպանի կայուն եւ կշռադատված հարաբերությունները», - եզրակացրել է Սերգեյ Մինասյանը:

Լուսանկարը՝ Արսեն Սարգսյանի / NEWS.am