ՆախընտրելիՀյուսիսային Կորեայի «Ընհա-3» հրթիռը մեկնակել է «Սոհե» տիեզերակայանից, նրան կցված է արհեստական «Քվանմենսոն-3» արբանյակը:
Հյուսիսային Կորեայի Կենտրոնական հեռագրային գործակալությունը հայտնել է, որ հեռահար հրթիռը հաջողությամբ արձակվել է, «Քվանմենսոն-3» արբանյակի երկրորդ տարբերակն «Ընհա-3» հրթիռակրի օգնությամբ դուրս է բերվել պահանջված ուղեծիր:
Ճապոնիայի կառավարությունը եւ Հարավային Կորեայի իշխանությունները հաստատել են հրթիռի արձակման փաստը: Տոկիոյում նշել են, որ «Ընհա-3»-ը Օկինավա նահանգն անցել է տեղական ժամանակով առավոտյան ժամը 10.01-ին (Երեւանի ժամանակով` կեսգիշերին մոտ):
Չնայած որ Ճապոնիայում ՀՀՊ հզոր համակարգ էր տեղակայված, այն չեն ակտիվացրել, հայտնում է BFM.RU-ն:
Հիշեցնենք, որ դեկտեմբերի 5-ին «Ընհա-3»-ը տեղակայվել էր ԿԺԴՀ-ի հյուսիս-արեւմուտքում գտնվող «Սոհե» տիեզերակայանում: Նախօրեին հայտնել էին, որ այն վերանորոգում են պահեստ տեղափոխելու համար: Չնայած որ տեխնիկական անսարքությունների պատճառով հրթիռի մեկնակը հետաձգվել էր, արդյունքում այն իրականացրել են նախապես նշանակված ժամկետում, հայտնում է vesti.ru-ն:
Արձակելուց 10 րոպե անց հրթիռակրի առաջին աստիճանը նախատեսվածի պես ընկել է Դեղին ծովը, մեկ րոպե անց հրթիռի այլ մասերն ընկել են Արեւելյան-Չինական ծովը, երրորդ անկումը գրանցվել է Խաղաղ օվկիանոսում` Ֆիլիպիններից 300 կմ հեռու:
ԱՄՆ-ն եւ նրա դաշնակիցները պնդում են, որ ԿԺԴՀ-ի գործողություններն արգելված բալիստիկական հրթիռների փորձարկումներ են, հաղորդում է BBC-ի ռուսական ծառայությունը: Ըստ գործակալության` Տոկիոն ՄԱԿ-ի ԱԽ-ի արտակարգ նիստ է պահանջել, եւ այն կարող է տեղի ունենալ հենց այսօր:
