Օխոտի ծովում խորտակված «Ամուրսկայա» բեռնանավի անձնակազմի որոնումներին մասնակցող կամավորները հայտարարել են Փոքր Շանտար կղզու ափին հայտնաբերված փրկարար բաճկոնների եւ մակույկի մասին:

Այդ եւ հարեւան կղզիներում մարդկային հետքեր չեն հայտնաբերվել: Գտնված մակույկում սարքավորումներ չկան, այդ պատճառով էլ  կորածների հարազատները եւ կամավորները ենթադրում են, որ նավաստիները, օգնություն չստանալով, կարողացել են  ցամաք դուրս գալ: Ակտիվիստները շարունակում են որոնել  «Ամուրսկայայի» նավաստիներին, գրում է «Ռոսիյսկայա գազետան»:

Rbc-ն նշում է, որ խորտակված բեռնանավի անձնակազմի ճակատագիրը դեռեւս անհայտ է: Ինը նավաստիներից մեկի մարմինը ջրասուզորդները հայտնաբերել էին նոյեմբերի 9-ին: Նավի որոնումները շարունակվել են շաբաթից ավելի, «Ամուրսկայան» հայտնաբերվել էր 25 մ խորությունում: Շուտով փրկարարները փչովի նավակ էին հայտնաբերել Ֆեկլիստովա կղզու ափերի մոտ, որից հետո  սկսել էին ենթադրել, որ անձնակազմի անդամները կարող էին  տարհանվել: 
Ներկայումս պաշտոնական որոնումները դադարեցվել են: Որոնողական աշխատանքները շարունակվում են  կորած անձնակազմի հարազատների  ջանքերով:

Հիշեցնենք, որ 700 տ ոսկու հանքանյութ տեղափոխող «Ամուրսկայա» բեռնանանավը կորել էր հոկտեմբերի 28-ին: Այն հայտնաբերվել էր նոյեմբերի 7-ին` 25 մ խորությունում: