Գլենդելի քաղաքային խորհրդի անդամ Արա Նաջարյանը պայքարում է Լոս Անջելեսի շրջանի մետրոպոլիտենի տրանսպորտային վարչությունում իր տեղի համար` չկարողանալով նշանակվել երկրորդ ժամկետում: Նրա խոսքով` դա կազմակերպվել է պաշտոնատար անձանց կողմից, ովքեր դժգոհ են եղել  Փասադենայով անցնող ավտոստրադան ընդլայնելու հարցում նրա անհամաձայնությունից, հաղորդում է  «Glendale News-Press»-ը:

Ըստ պարբերականի, Սան Գաբրիելի հովտի մի քանի ներկայացուցիչներ, ովքեր ցանկանում են հասնել երկու ավտոստրադաների միավորմանը, անցած շաբաթ  ընթացակարգային քվեարկության ժամանակ չեն աջակցել Նաջարյանին: «Դա նախապես էր կազմակերպված»,-հայտարարել է Նաջարյանը, որի  լիազորությունների ժամկետն ավարտվում է  հունվարի  1-ին:

Նաջարյանը ծրագրում է հասնել երկրորդ նշանակմանը հյուսիսային քաղաքների ներկայացուցիչների կողմից  եւ նորից կանգնել ընտրական հանձնաժողովի առջեւ, հավանաբար, հունվարին: