ՆախընտրելիՖրանսիայի իշխանությունները որոշել են պայքարել կրոնական մոլեռանդների դեմ: Երկրի ՆԳՆ-ի ղեկավար Մանուել Վալսը հայտարարել է, որ ներգաղթյալ մոլեռանդ իմամները կարտաքսվեն, ինչպես նաեւ հարկադրաբար կցրվեն առավել մարտական խմբավորումները՝ անկախ քարոզած կրոնից, դա վերաբերում է նույնիսկ ավանդական կաթոլիկներին:
Vesti FM ռադիոն հայտնում է, որ որպես օրինակ Մանուել Վալսը հիշեցրել է Civitas-ի մասին: Տվյալ ուլտրաաջ կաթոլիկական շարժումը, որը կապ ունի ծայրահեղական կազմակերպության հետ, եռանդով հետապնդում է «սրբապիղծներին»: Հենց այդ խումբն էր նախորդ ամիս Փարիզում ծեծել ֆեմինիստուհիների խմբին, որոնք նույնասեռական ամուսնությունների աջակցությանը նվիրված բողոքի ցույց էին կազմակերպել:
Կրոնական մոլեռանդներին պետք է հայտնաբերի ոստիկանությունը: Ըստ նախարարի՝ նման ծայրահեղ քայլերի կառավարությանը դրդել են Ֆրանսիայում ծայրահեղական իսլամիզմի դրսեւորման հաճախակի դեպքերը, մասնավորապես Թուլուզում մարտ ամսվա դեպքերը, երբ Մոհամեդ Մերան սպանել էր երեք զինվորի եւ չորս հրեաների:
Հայտարարությունն արվել է այն բանից հետո, երբ Ֆրանսիայի նախագահ Ֆրանսուա Օլանդը հայտնել է հատուկ գործակալության ստեղծման մասին, որը պետք է հետեւի պետությունից եկեղեցու անջատման սկզբունքին: Ֆրանսիան կաթոլիկական երկիր է: Միաժամանակ այժմ, ըստ պաշտոնական տվյալների, երկրի տարածքում ապրում են շուրջ չորս միլիոն մահմեդականներ եւ քառորդ միլիոն հուդայականներ:
