նախընտրելի դարձնելԴոնորությունը առողջապահական համակարգի շատ կարեւոր խնդիրներից է: Անցնող տարում տվյալ բնագավառում բազմաթիվ բարեփոխումներ են արվել: Այդ մասին այսօր՝ դեկտեմբերի 14-ին լրագրողներին հայտնել է Հայաստանի առողջապահության նախարարության Արյունաբանական կենտրոնի տնօրեն, պրոֆեսոր Սմբատ Դաղբաշյանը:
«Արյան փոխներարկման եւ բուժօգնության գործընթացը կարգավորող օրենսդրական դաշտ ստեղծելու առաջին քայլը 2011թ. նոյեմբերի 15-ին Ազգային ժողովում ընդունված «Մարդու արյան եւ դրա բաղադրամասերի դոնորության եւ փոխներարկումային բժշկական օգնության մասին» օրենքն էր: Այդ օրենքով կարգավորվում են մարդու արյան եւ նրա բաղադրամասերի, փոխներարկման եւ դրա կատարման որակի հետ կապված հարցերը», - նշել Հայաստանի առողջապահության նախարարության գլխավոր արյունաբանը՝ հավելելով, որ այդ օրենքով սահմանվել են դոնորության եւ փոխներարկման հիմնական սկզբունքները, դոնորների, արյուն ստացողների, բժշկական եւ այլ կազմակերպությունների իրավունքներն ու պարտականությունները:
Նրա խոսքով՝ Հայաստանը որակյալ դոնորական արյուն ունենալու բոլոր հնարավորություններն ունի: Հայաստանում արյուն հավաքելու խնդրի վերաբերյալ հարցին Դաղբաշյանը պատասխանել է, որ Հայաստանում կամավորների ինստիտուտն այդպես էլ չձեւավորվեց: «Առողջապահության համաշխարհային կազմակերպության եւ Դոնորների միջազգային ասոցիացիայի չափանիշների համաձայն՝ երկրին արյան բաղադրամասերով ինքնապահովելու համար անհրաժեշտ է, որպեսզի բնակչության 2 տոկոսը դոնոր լինի, սակայն հանրապետությունում այդ ցուցանիշն այժմ ընդամենը մոտ 0,3% է»,- ասել է երկրի գլխավոր արյունաբանը ՝ այդ համատեքստում նշելով քարոզչության կարեւորությունը:
