նախընտրելի դարձնելՀայաստանի նախագահի աշխատակազմի նախկին ղեկավար, ԱԺ պատգամավոր Կարեն Կարապետյանը իրեն վարչապետի պաշտոնում նշանակելու մասին լուրերը որակում է որպես «որոշ մարդկանց ֆանտազիաների արդյունք»: Այս մասին այսօր՝ դեկտեմբերի 15-ին, ՀՀԿ 14-րդ համագումարում լրագրողների հետ հանդիպմանն ասաց ԱԺ պատգամավոր Կարեն Կարապետյանը:
«Իմ էությամբ գործադիր մարդ եմ, սիրում եմ գլուխս կախ աշխատել»,- ասաց նա: Կարեն Կարապետյանը նշեց, որ տարբեր խոսակցություններ կարող են շրջանառվել, բայց այդ լիազորությունները նախագահի իրավասության դաշտում են: «Նախագահը ում կորոշի, այդպես էլ կլինի: Էդ արդեն վարչապետի հանե՞լ եք, մի հատ էլ նոր վարչապետ եք դնում արդեն: Նախագահը երբ հարմար գտնի, այն ժամանակ էլ կփոխի»,- ասաց նա:
Նախարար նշանակվելու հնարավորության մասին նա նշեց, որ նախարարի պաշտոնի շրջանը վաղուց է անցել: Կարեն Կարապետյանն ասաց, որ պաշտոնը իր համար ինքնանպատակ չէ, այլ ինչ-որ մի բան պետք է անես, օրինակ բերելով այն, որ նախագահի աշխատակազմի ղեկավար էր, ինչը բավական բարձր պաշտոն էր, բայց «նախագահի համաձայնությամբ եւ իր կամքով դուրս է եկել այդ պաշտոնից»:
«Ես իմ ուժերը, ընտանիքիս անձնական հնարավորությունները փորձում եմ օգտագործել մարդկանց աջակցելու առումով: Իսկ ընտրություններից հետո կորոշեմ իմ արտահայտման ձեւը, իմ ուժերը կօգտագործեմ պետական կառավարման, թե մասնավոր դաշտում»,- ասաց նա՝ չբացառելով գործարարությամբ զբաղվելը, քանի որ ինքը իրեն այդ դաշտում տեսնում է, առավել եւս, որ նախկինում լուրջ հաջողություններ է ունեցել:
Հարցին, թե ինչու նրան ԱԺ-ում հաճախակի չենք տեսնում, նա նշեց, որ պատգամավորի աշխատանքը միայն ԱԺ-ում չի սահմանափակվում, առավել քան այսօր մեծ անհրաժեշտություն կա լինել ընտրողների կողքին եւ հնարավորությունների սահմաններում օգնել նրանց: Պատգամավորի խոսքով՝ մարդկանց վիճակ ծանր է ինչը պայմանավորված է օբեյտիվ եւ սուբյեկտիվ պատճառներով, միեւնույն ժամանակ հավելեց, որ միգուցե մեզնից յուրաքանչյուրը իր ֆունկցիաները կատարելուց փոքր-ինչ թերացել է:
