Ֆրանսիայի վարչապետ Ժան Մարկ Էյրոն երկուշաբթի հայտարարել է, որ Ժերար Դեպարդիեին «խղճուկ» չի անվանել, սակայն այդպիսին է համարում դերասանի «հարկային փախուստը» Բելգիա եւ կոչ է անում ունեւոր ֆրանսիացիներին հայրենասիրություն եւ քաղաքացիական համերաշխություն ցուցաբերել  ֆինանսական եւ տնտեսական ճգնաժամի շրջանում:

Ֆրանսիայում նախագահական նախընտրական արշավի ամենաբուռն շրջանում սոցիալիստների առաջնորդ Ֆրանսուա Օլանդն առաջարկել է բյուջեի դեֆիցիտի հաղթահարման  նպատակով  2013թ-ից  տարեկան մինչեւ մեկ մլն եվրո վաստակող քաղաքացիների համար եկամտահարկի դրույքաչափը սահմանել մինչեւ  75%:

Այս կապակցությամբ  ունեւոր անձինք, որոնց թվում` Դեպարդիեն, որոշել են լքել Ֆրանսիան: Ֆրանսիայի վարչապետը քննադատել էր դերասանին, նրան «խղճուկ» անվանելով: Կիրակի Դեպարդիեն հանդես էր եկել բաց նամակով` հայտարարելով, որ հրաժարվում է ֆրանսիական անձնագրից  եւ սոցիալական ապահովագրությունից, քանի որ վիրավորված էր վարչապետի արտահայտությունից:

«Ես պարոն Դեպարդիեին  խղճուկ չեմ անվանել, ես ասացի, որ դրանում խղճալի կողմ կա: Ես ասել եմ, որ Դեպարդիեն, մեծ դերասան է, որին ֆրանսիացիները սիրում են: Սակայն իմ ելույթում ես նաեւ քաղաքացիական համերաշխության կոչ եմ արել, քանի որ ճգնաժամային պայմաններում հարկերի վճարումը յուրաքանչյուր ֆրանսիացու պարտքն է»,-հայտարարել է վարչապետը: