նախընտրելի դարձնելԶանգվածային անկարգությունների ընթացքում ոստիկանության ստորաբաժանումների փոխհամագործակցությունը եւ գործողությունների ներդաշնակումն ապահովելու, զինծառայողների եւ ոստիկանության ծառայողների ունակություններն ու հմտությունները կատարելագործելու նպատակով ՀՀ ոստիկանության պետի հրամանով դեկտեմբերի 17-ից 19-ը «Արզնի» օդանավակայանի տարածքում` «Ոստիկանության համահավաք ջոկատի գործողությունները զանգվածային անկարգությունների կանխման եւ խափանման ընթացքում» թեմայով կազմակերպվել եւ անցկացվել է հրամանատարաշտաբային զորավարժություն` ոստիկանության ստորաբաժանումների եւ ոստիկանության զորքերի ծառայողների մասնակցությամբ:
Ոստիկանության լրատվության վարչությունից հայտնում են, թե զորավարժության կազմակերպման եւ անցկացման նպատակով ստեղծվել էր օպերատիվ շտաբ` ՀՀ ոստիկանության զորքերի հրամանատար, ոստիկանության պետի տեղակալ, գեներալ-մայոր Լեւոն Երանոսյանի ղեկավարությամբ:
Դեկտեմբերի 19-ին տեղի ունեցավ զորավարժության գլխավոր փուլը, որին նախորդեց հատուկ տեխնիկայի ցուցադրությունը: Բուն զորավարժության ընթացքում ստորաբաժանումները, նախնական պլանի համաձայն, լիարժեք իրականացրին առաջադրված խնդիրները:
Հրամանատարաշտաբային զորավարժությունն անցավ կազմակերպչական պատշաճ մակարդակով:
Վարժանքների ընթացքում առավել աչքի ընկած ծառայողները ՀՀ ոստիկանության պետի եւ ոստիկանության զորքերի հրամանատարի կողմից արժանացան պարգեւների:
Զորավարժության ավարտին ոստիկանության պետ, գեներալ-լեյտենանտ Վլադիմիր Գասպարյանը ճեպազրույց ունեցավ լրագրողների հետ:
