նախընտրելի դարձնել
Իրանի խորհրդարանը ինքնաթիռներին արգելել է թռիչքներ կատարել ազանի (պարտադիր աղոթքի կոչ) ժամանակ: Mehr գործակալությանը հաղորդմամբ, այդ մասին հայտնել է Իրանի խորհրդարանի մշակույթի հանձնաժողովի պաշտոնական ներկայացուցիչ Ալի Թահերին:
Ըստ նրա` արգելքը հատկապես վերաբերում է առավոտյան աղոթքի կոչին: Նա ընդգծել է, որ լուրջ ուշադրություն կդարձվի նաեւ օդանավակայաններում կամ ավիաընկերություններում աշխատող կանանց հագուստին:
Իրանի ավիացիոն կազմակերպության ղեկավար Համիդ Ռեզա Փահլեւանին իր հերթին հայտարարել է, որ ինքնաթիռների թռիչքը կթույլատրվի ազանից 30 րոպե անց, որպեսզի ուղեւորները իրենց «կրոնական պարտականությունների կատարման համար» բավարար ժամանակ ունենան, հայտնում է «Ինտերֆաքս ռելիգիան»:
Ազանն աղոթքի կոչ է, որը մզկիթի ծառայողը` մուեձինը, ազդարարում է մինարեթից: Ըստ իսլամի օրենքների` յուրաքանչյուր մահմեդական պետք է աղոթի օրվա մեջ հինգ անգամ` առավոտյան,կեսօրին, կեսօրից հետո, երեկոյան եւ գիշերը:
