նախընտրելի դարձնելԻրանը այսօր՝ փետրվարի 9-ին սկսել է ուրանի մինչեւ 20 տոկոս հարստացման աշխատանքները:
Ինչպես հաղորդում է Deutsche Welle-ն, վկայակոչելով պետական Al Alam հեռուստաընկերությանը, աշխատանքները սկսվել են ՄԱԳԱՏԷ-ի տեսուչների ներկայությամբ:
Ուրանի հարստացումն իրականացվում է Նեթենզեի գործարանում: Ինչպես հաղորդել է ՄԱԳԱՏԷ-ում Իրանի ներկայացուցիչ Ալի-Ասգար Սոլթանիեն, Թեհրանը միջազգային գործակալությանը հատուկ ուղերձով տեղեկացրել է աշխատանքների սկսման մասին:
Նա նշել է, որ աշխատանքներն իրականացվելու են միջազգային վերահսկողության ներքո:
Ի դեպ, ատոմային էներգիայի իրանական գերատեսչության ղեկավար Ալի Աքբար Սալեհին հայտարարել էր, թե երրորդ երկրներից հարստացված ուրան ստանալու Թեհրանի մտադրությունը մնում է ուժի մեջ. «Երբ մենք ստանանք ատոմային վառելիքը, հարստացման աշխատանքները կդադարեցվեն»:
Այսօր ՄԱԳԱՏԷ-ն հաղորդագրություն է տարածել՝ նկատելով, որ Թեհրանի որոշումը կարող է վնաս հասցնել Իրանի հետազոտական ռեակտորը ատոմային վառելիքով ապահովելու ջանքերին:
Հիշեցնենք, որ փետրվարի 7-ին Իրանի նախագահ Մահմուդ Ահմադինեջադը երկրի փոխնախագահ Ալի Աքբար Սալեհիին հանձնարարել էր սկսել ուրանի հարստացման աշխատանքները:
