Իրանի իշխանությունները ձերբակալել են ընդդիմության առաջնորդներից մեկի՝ Միր Հոսեյն Մուսավիի դուստրերին, որն իր կնոջ՝ Զահրա Ռահնավարդի հետ տնային կալանքի տակ է:

Նարգես եւ Զահրա քույրերին ձերբակալել են վերջիններիս տանը: Հայտնի չէ, թե իրավապահներն ուր են տարել նրանց, գրում է lenta.ru-ն՝ վկայակոչելով Reuters-ին: Մուսավին երեք դուստր ունի:

Միր Հոսեյն Մուսավին 1980-ականներին Իրանի վարչապետն էր: 2009թ.  նա  վճռել էր վերադառնալ քաղաքականություն եւ դարձել նախագահական ընտրությունների ընդդիմադիր թեկնածուներից մեկը: Այնուհետեւ նա ակտիվորեն մասնակցել է ցույցերին: 

2011թ.  «արաբական գարնան» ազդեցութամբ Մուսավին եւ մեկ այլ ընդդիմադիր Մեհդի Քարուբին փորձեցին նորից զանգվածային ցույցեր կազմակերպել Իրանում: Դրա համար երկուսն էլ տնային կալանքի ենթարկվեցին:  Պաշտոնապես նրանք այդպես էլ չձերբակալվեցին կամ դատապարտվեցին: 

2013թ. հունիսին Իրանում կկայանան նախագահական ընտրություններ: