նախընտրելի դարձնելGoogle ընկերությունը Google I/O կոնֆերանսում հայտարարել է Google Glass-ի վեց ծրագրերի թողարկման մասին՝ ներառյալ սոցիալական Facebook, Twitter եւ Tumblr հավելվածները:
TechCrunch-ը հայտնում է, որ Twitter-ի օգնությամբ օգտվողները նույն ժապավենում կարող են դիտել վերջին թվիթները եւ անձնական նամակները: Ծրագիրը նաեւ հնարավորություն է տալիս լուսանկարել ակնոցի տեսախցիկով եւ միանգամից տեղադրել Twitter-ում: Նույն գործառույթը կա նաեւ Facebook-ի համար: Ամենաշատ գործառույթներ ունի Tumblr բլոգհոսթինգի հավելվածը: Այն կարտացոլի օգտատիրոջ ամբողջ պատը՝ ներառյալ տեքստեր, լուսանկարներ եւ տեսանյութեր:
Բացի սոցիալական հավելվածներից, Google-ը նոր հավելված է ներկայացրել Evernote գրառումների համար, եւ CNN-ի եւ Elle ամսագրի հավելվածները, գրում է lenta.ru-ն:
The Verge-ը հայտնում է, որ Google ընկերությունը կոնֆերանսի շրջանակում կայացած հատուկ սեմինարի ժամանակ նաեւ ներկայացրել է Glass ակնոցները «կոտրելու» հնարավորությունները:
Սկզբում Google-ի ինժեներները ակնոցների վրա տեղադրել են «մաքուր » Android: Կոտրելուց հետո սարքին Bluetooth-ով միացրել են ստեղնաշար եւ թրեքփադ: Այնուհետեւ, օգտագործելով Android Terminal Emulator եւ Complete Linux Installer ծառայությունները, Google-ի աշխատակիցները ակնոցների վրա են ներբեռնել Ubuntu օպերացիոն համակարգը:
Սեմինարի նպատակն էր Glass ակնոցների հնարավորությունների ցուցադրումը: Այնուամենայնիվ, սեմինարի այցելուներին նախազգուշացրել էին, որ ակնոցները «կոտրելը» հանգեցնում է սարքի երաշխիքի կորստին:
