ԱՄՆ-ի ռազմածովային ուժերը մտադիր են այս տարի Նորֆոլքում բացել եռաչափ տպագրության փորձարարական  կենտրոն: Նոր տեխնոլոգիան զինվորականների ուշադրությունը գրավել է հիդրոդինամիկ ուսումնասիրությունների համար արագ եւ էժան բացառիկ մոդելներ պատրաստելու հնարավորությամբ:

DefenseNews-ը գրում է, որ ԱՄՆ-ի ռազմածովային ուժերի մասնագետները  եռաչափ տպագրության գլխավոր առանձնահատկություններից մեկն են համարում  արդեն արտադրությունից հանված  եւ պատվերի համար անհասանելի դետալների  վերարտադրության հնարավորությունը: Այդպիսով, ԱՄՆ-ի ռազմածովային ուժերի ինժեներներն արդեն պատրաստում են նմուշներ հատուկ պահեստամասերի արտադրության համար, իսկ ռազմական բժիշկները պատվիրում են պրոթեզների դետալներ:

Արդեն նոյեմբերին ռազմածովային ուժերը նախատեսում են թողարկել  եռաչափ տպիչներ, իսկ դեկտեմբերին մտադիր են ստեղծել ռետինե միջադիրների արտադրամասեր, որոնց կարիքն ինժեներները մշտապես ունեն, գրում է lenta.ru-ն: Փորձարկումները տեղի կունենան Նորֆոլքում եւ Սան Դիեգոյում: