նախընտրելի դարձնելGoogle համացանցային ընկերության գաղտնիության քաղաքականությունը չի համապատասխանում Ֆրանսիայի օրենսդրությանը եւ պետք է վերանայվի երեք ամսվա ընթացքում: Այս մասին հայտարարել է ֆրանսիական իրավաբանական CNIL կարգավորողը:
Հակառակ դեպքում ընկերությունը պետք է տուգանք վճարի՝ սկզբում 150 հազար եվրո, իսկ եթե դրանից հետո փոփոխություններ չհետեւեն, ապա ՝ կրկնակի, հայտնում է BBC-ի ռուսական ծառայությունը:
CNIL-ում հայտնել են, որ առաջիկա շաբաթվա ընթացքում ընկերությանը նմանատիպ պահանջ կներկայացնեն նաեւ Իսպանիան, Մեծ Բրիտանիան, Գերմանիան, Իտալիան եւ Նիդեռլանդները:
Օգտվողների անձնական տվյալների հավաքագրման վերաբերյալ ընկերության մոտեցումն անհանգստացնում է եվրոպական կարգավորողներին: Անցյալ տարվա մարտին Google-ը որոշել էր հավաքել իր բոլոր 60 ծառայությունների, այդ թվում՝ YouTube-ի եւ Google+ սոցցանցի օգտվողների վերաբերյալ տեղեկություններ՝ «օգտվողի ամբողջական պատկերը» կազմելու համար:
ԵՄ-ում պահանջել էին, որպեսզի ընկերությունն օգտվողներին տեղեկացնի, թե ինչպիսի տվյալներ է նրանց մասին հավաքում եւ ինչպես է դրանք օգտագործում:
