Հայաստանի Հանրապետության Հանրային ծառայությունները կարգավորող հանձնաժողովն այսօր՝ հուլիսի 17-ին, ընդունել է «Հանրային էլեկտրոնային հաղորդակցության շարժական կապի համարների տեղափոխելիության ծառայության կանոնները»:

Ըստ այդմ՝ Հայաստանում շարժական կապի հեռախոսահամարների տեղափոխելիության համակարգը (MNP ծառայություն) կգործարկվի 2014 թվականի հունվարի 1-ից:

MNP -ն (Mobile Number Portability) բաժանորդներին թույլ է տալիս օպերատորին փոխելուց հետո պահպանել համարը:

Սահմանվել է, որ համարի տեղափոխելիության ծառայությունը Բաժանորդի համար անվճար է եւ դրանից օգտվելու Բաժանորդի իրավունքը Օպերատորների կողմից չի կարող սահմանափակվել:

Համարի տեղափոխման գործընթացն իրականացվում է 3 աշխատանքային օրվա ընթացքում, բացառությամբ Բաժանորդի կողմից ավելի ուշ ժամկետ սահմանելու դեպքի, որը չի կարող գերազանցել 30 օրը: