Իրանի Իսլամական Հանրապետություն աշխատանքային այցի շրջանակներում Հայաստանի նախագահ Սերժ Սարգսյանն, այսօր՝ օգոստոսի 5-ին, Թեհրանում հանդիպում է ունեցել Իրանի նորընտիր նախագահ Հասան Ռոհանիի հետ:

Նախագահի մամուլի գրասենյակից հայտնում են, որ հանդիպման սկզբում Իրանի նախագահը շնորհակալություն է հայտնել նախագահ Սերժ Սարգսյանին հրավերն ընդունելու եւ երդմնակալության արարողությանը մասնակցելու համար: Սերժ Սարգսյանը եւս մեկ անգամ շնորհավորել է Հասան Ռոհանիին՝ Իրանի նախագահի պաշտոնում ընտրվելու կապակցությամբ եւ մաղթել բեղմնավոր աշխատանք ու նորանոր հաջողություններ այդ բարձր եւ պատասխանատու պաշտոնում:

Երկու երկրների նախագահները հանդիպմանը քննարկել են ինչպես երկկողմ, այնպես էլ բազմակողմ հարաբերություններին վերաբերող հարցերի լայն շրջանակ: Զրուցակիցներն ընդգծել են, որ հայ-իրանական համագործակցության օրակարգը բավականին հարուստ է եւ վկայում է մի շարք խոշոր նախագծերի իրականացման մասին: Գոհունակություն հայտնելով Հայաստանի եւ Իրանի միջեւ ձեւավորված ավանդական դարավոր բարեկամության վրա հիմնված փոխշահավետ համագործակցության բարձր մակարդակից՝ նախագահներ Սերժ Սարգսյանը եւ Հասան Ռոհանին ընդգծել են այդ համագործակցությունը նոր՝ ավելի բարձր հանգրվանի հասցնելու անհրաժեշտությունը:

Զրուցակիցներն անդրադարձել են նաեւ տարածաշրջանային խնդիրներին, մասնավորապես Լեռնային Ղարաբաղի հակամարտության բանակցային գործընթացի ներկա վիճակին:

Նախագահներ Սերժ Սարգսյանը եւ Հասան Ռոհանին ջերմությամբ են հիշել ազգային անվտանգության խորհուրդների քարտուղարների մակարդակով իրենց հանդիպումները եւ պատրաստակամություն հայտնել նույն ոգով աշխատել հայ-իրանական համագործակցության խորացման ուղղությամբ: