Նախընտրելի
Բրազիլիայի իշխանությունները կգործադրեն բոլոր ջանքերը՝ երկրի էլեկտրոնային փոստը լրտեսումից պաշտպանելու համար:
Նախագահ Դիլմա Ռուսեֆը հայտարարել է, որ դա պաշտոնական հաղորդագրությունների պաշտպանությանն ու հնարավոր լրտեսումը կանխարգելելուն ուղղված առաջին քայլը կդառնա, փոխանցում է gazeta.ru-ն՝ վկայակոչելով The Globo-ն:
«Տվյալների մշակման դաշնային ծառայությանը հանձնարարել եմ վստահելի email-համակարգ ներդնել` դաշնային ողջ կառավարության համար»,– Twitter-ի իր էջում գրել է Ռուսեֆը:
Ավելի վաղ ԿՀՎ-ի նախկին գործակալ Էդվարդ Սնոուդենի նյութերից հայտնի էր դարձել, որ ԱՄՆ-ն Կանադայի հետ համատեղ լրտեսել է երկրի նախագահին եւ Բրազիլիայի հանքարդյունաբերության եւ էներգետիկայի նախարարին: Դա դարձել էր երկրների միջեւ կոնֆլիկտի պատճառ, որի հետեւանքով էլ չեղյալ էին հայտարարվել մի քանի այցեր, այդ թվում նաեւ` Ռուսեֆի այցը: Բրազիլիան լրտեսության համար խիստ քննադատել էր ԱՄՆ-ին:
