Իռլանդիան հայտարարել է հարկային սողանցքը վերացնելու մասին, որը Apple-ին հնարավորություն էր տալիս  մոտ 40 միլիարդ դոլար հարկ վճարելուց խուսափել: Երկրի ֆինանսների նախարար Մայքլ Նունանը հայտնել է, որ ծրագրում է  Իռլանդիայում գրանցված ընկերություններին պարտավորեցնել հարկային քաղաքացիություն ստանալ:

Միաժամանակ, Իռլանդիայի ֆինանսների նախարարության ներկայացուցիչը նշել է, որ ընկերությունները կարող են դառնալ ցանկացած երկրի հարկային քաղաքացի, ներառյալ այն պետությունները, որտեղ հարկային զրոյական տոկոսադրույք է գործում, օրինակ՝ Բերմուդյան կղզիներում:  Նա նաեւ հերքում է, որ տվյալ քայլերը կապված են ԱՄՆ-ի կողմից ճնշման հետ, հայտնում է rbc-ն: 

Տվյալ օրենսդրական նախաձեռնությունը հազիվ թե մեծացնի ընկերությունների հարկային հատկացումները, որոնք այլ սողանցք կարող են գտնել, հայտնում է   Reuters-ը:

Նշենք, որ Apple-ից բացի Դուբլինում դուստր ձեռնարկություններ ստեղծելու ճանապարհով հարկերից խուսափելու հնարավորությունից օգտվում են նաեւ Google-ը եւ Microsoft-ը:

2013թ. մայիսին հաղորդվել էր, որ  Apple-ը մասնաճյուղային ընկերությունների միջոցով ԱՄՆ-ի սահմաններից դուրս  էր հանել իր 145 միլիարդ դոլարից 102 միլիարդ դոլարը ՝ տարեկան հարկ վճարելուց խուսափելու համար:  Հաղորդվել էր, որ փողերի մի մասը Իռլանդիայում է, որտեղ խոշոր ընկերությունների շահույթի կորպորատիվ հարկը 12% է: Դրանից էլ օգտվում են միջազգային ձեռնարկությունները, այդ թվում նաեւ՝ Apple-ը: