Ուկրաինայի դեպքերը Հայաստանում նույն ձեւով չեն կարող կրկնվել: Փետրվարի 24-ի մամուլի ասուլիսում այս մասին հայտարարել է «Արեւելյան գործընկերության» քաղաքացիական հասարակության համաժողովի Հայաստանի հարցերով համակարգող,  Երեւանի մամուլի ակումբի ղեկավար Բորիս Նավասարդյանը:

Ըստ նրա`Հայաստանի բնակչությունն ավելի միատարր է եւ մասերի բաժանված չէ, ինչպես որ Ուկրաինայի դեպքում: «Վճռորոշ պահին մեր բնակչությունը հակված է գործելու ավելի հավասարակշռված եւ պատասխանատու», - նշել է Նավասարդյանը: Ըստ նրա համոզման` Հայաստանի ողջ քաղաքական դաշտը խելացի կլինի, եթե հասկանա, որ  իրենց քաղաքական նպատակներին հասնելու համար մարդիկ չեն կարող որպես գործիք ծառայել:  «Մարդիկ պետք է ընկալվեն որպես գիտակից սուբյեկտներ: Կարեւոր է, որպեսզի հասարակությունը նույնպես հասկանա, որ երկրի տերն է, եւ ձեւավորի իր օրակարգը:  Այն ամենը, ինչ կատարվում է, պայմանավորված է Հայաստանում  ազդեցիկ որոշումներ կայացնելու մեխանիզմների բացակայությամբ: Բացի դրանից` հասարակությունը ցանկանում է  կանխատեսելի իշխանություն տեսնել, որը հստակ գիտի` ինչ է անում եւ ուր է գնում», - ընդգծել է Բորիս Նավասարդյանը, հավելելով, որ ցանկացած իշխանություն, որը ճամփի կեսից փոխում է քաղաքական  վեկտորը, անկախ ամեն ինչից,  կորցնում է վստահությունը: Ըստ Նավասարդյանի`այսօր երկրում քաղաքական ուժերը ցանկանում են ղեկավարել այն` չունենալով օրակարգ:

Լուսանկարը՝ Արսեն Սարգսյանի/ NEWS.am