նախընտրելի դարձնելԵրկրապահ կամավորների միության համագումարի ժամանակ նախագահ Սերժ Սարգսյանը պատերազմ հայտարարեց հայ ժողովրդին: Այս մասին այսօր` փետրվարի 25-ին, լրագրողների հետ հանդիպման ժամանակ ասաց ազատամարտիկ Սուրեն Սարգսյանը՝ հավելելով, որ Ազատամարտիկների ռազմադաշտային ընդլայնված խորհուրդը մարտի 1-ին հավաքվելու է Սարյանի պուրակում եւ պայքարելու իշխանությունների դեմ:
«Մարտի 1-ին տղերքով հավաքվելու ենք Սարյանի պուրակում եւ կոչ ենք անում բոլորին միանալ մեզ»,- ասաց նա:
Ազատամարտիկը հրաժարվեց մեկնաբանել, թե ինչ է լինելու այդ օրը. «Կգաք, կտեսնեք, թե ինչ կանենք: Ամեն դեպքում մենք պայքարելու ենք իշխանությունների դեմ»:
Լրագրողների հարցին` արդյոք ազատամարտիկները միանալո՞ւ են Հայ ազգային կոնգրեսի՝ նույն օրը կայանալիք հանրահավաքին, Սուրեն Սարգսյանը պատասխանեց. «Սա ՀԱԿ-ի հանրահավաքը չէ, որովհետեւ այնտեղ է լինելու ժողովուրդը: «Մարտի 1-ը» բոլորինն է, ժողովրդինն է, և որ այդ օրը կարող են բոլորը հանրահավաք հայտարարել, օրինակ՝ Սողոմոն Թեհլերյանը: Մենք որոշում կկայացնենք տղերքով ՝ ինչ ենք անում, կդիմենք հանրահավաքին այն կոչով, որը հարմար կգտնենք: Այո, մենք եւս մասնակցելու ենք այդ հանրահավաքին, որովհետեւ այնտեղ ժողովուրդն է լինելու»:
Իր հերթին ազատամարտիկ Վարդան Մալխասյանը հույս հայտնեց, որ իրենց հավաքին նույնպես շատ մարդ կլինի. «Մոտավորապես 3 հազար ազատամարտիկ է լինելու: Ասեմ նաեւ, որ մեր հավաքը գարունն է հետ բերելու»:
Նշենք, որ մարտի 1-ին հանրահավաք է կազմակերպում նաեւ ՀԱԿ-ը, որի ժամանակ ելույթ կունենա Հայաստանի առաջին նախագահ Լեւոն Տեր-Պետրոսյանը:
Հիշեցնենք, որ 2008թ. փետրվարի 18-ի նախագահական ընտրություններից հետո Հայ ազգային կոնգրեսի կողմնակիցներն ու նախագահի թեկնածու Լեւոն Տեր-Պետրոսյանը հավաքվել էին Ազատության հրապարակում եւ պահանջում էին ընտրությունների վերանայում: Մարտի 1-ին ՀԱԿ-ի կողմնակիցների եւ ուժայինների միջեւ տեղի ունեցած բախումների հետեւանքով զոհվել էր 10 քաղաքացի: Արդեն 6-րդ տարին անընդմեջ ՀԱԿ կողմնակիցները հավաքվում են Ազատության հրապարակում` հարգելու զոհերի հիշատակը: Մինչ օրս 10 զոհերի համար ոչ ոք պատասխանատվություն չի կրել:
