նախընտրելի դարձնելԼոռիի մարզում չնայած ընդերքարդյունահանման, վերամշակման եւ արտադրական ցուցանիշների աճին, ոլորտը դեռեւս հեռու է բավարար լինելուց: Ներկայիս ընդերքարդյունահանման ցուցանիշները կազմում են նախկին ԽՍՀՄ-ի ցուցանիշների 7-8 %-ը: Այս մասին նշված է Լոռիի մարզի 2014-2017թթ. սոցիալ-տնտեսական զարգացման ծրագրում, հաղորդում է «ԷկոԼուրը»:
Աղբյուրի համաձայն` 2013թ. հունիսի 1-ի դրությամբ մարզի տարածքում հանքարդյունահանման իրականացման իրավունք են ունեցել շուրջ 50 կազմակերպություններ, որոնցից 5-ն իրականացնում են մետաղական հանքավայրերի շահագործում` Ալավերդու, Շամլուղի պղնձի հանքավայրերը, Մղարթի եւ Արմանիսի ոսկի-բազմամետաղային հանքավայրերը, նախապատրաստվում է շահագործման Թեղուտի պղինձ-մոլիբդենային հանքավայրը:
Հանքարդյունաբերության տեսակետից հանրապետությունում երկրորդը համարվող Լոռիի մարզում որպես տվյալ ոլորտի ուժեղ կողմ մասնավորապես մատնանշվում է շահագործվող եւ շահագործմանը պատրաստ ոսկու, մոլիբդենի, պղնձի եւ բազմամետաղային հանքավայրերի առկայությունը, նոր մետաղական հանքավայրերի երկրաբանահետախուզական աշխատանքների ակտիվացումը: Ոլորտի թույլ կողմերից էլ մասնավորապես նշվում են` հանքահարստացման, մետաղաձուլական, քարամշակման գործարանների եւ արտադրամասերի հնացած տեխնոլոգիաները ու մաշված սարքավորումները:
Ծրագրում հանքարդյունաբերության ոլորտի կարգավորմանն ուղղված 11 առաջարկություն է արված, որոնցից ուշագրավներից է հետեւյալը. «Հաշվի առնելով անտառածածկ տարածքների անմխիթար վիճակը, միանշանակ արգելել տվյալ տարածքներում երկրաբանահետախուզական եւ արդյունահանման աշխատանքները, եթե խոսքը չի վերաբերվում պետական ռազմավարական գերակա շահերին...»:
