նախընտրելի դարձնել«Ոսկե Ծիրան» կինոյի զարգացման հիմնադրամը եւ «Փյունիկ» բարեգործական հիմնադրամը Մեծ Եղեռնի 100-ամյա տարելիցին ընդառաջ հայտարարել են սցենարական մրցույթ։
Մասնագիտական ժյուրին, որի կազմը դեռեւս չի հրապարակվում, հայտագրված կարճամետրաժ խաղարկային եւ վավերագրական ֆիլմերի սցենարներից կընտրի լավագույնը տասը: Դրամական պարգեւների կարժանանան բոլոր 10 սցենարները՝ լավագույն 3-ը՝ 1000-ական, 7-ը՝ 500-ական ԱՄՆ դոլարին համարժեք դրամ:
Մրցույթը տարիքային կամ ազգային սահմանափակում չունի, մասնակցել կարող են հեղինակներ ամբողջ աշխարհից, կընդունվեն նաեւ գրական հիմք ունեցող սցենարներ: Մրցույթի վերջնաժամկետը 2014 թ. հունիսի 30-ն է:
«Փյունիկ» բարեգործական հիմնադրամի հոգաբարձուների խորհրդի նախագահ Լեւոն Սարգսյանն ընդգծեց, որ այս նախաձեռնությունը կարեւոր է ոչ միայն որպես մշակութային ծրագիր. «Սա կարեւոր է նաեւ որպես դիվանագիտական քայլ՝ նվիրված ազգի հիմնական ու ամենակարեւոր խնդիրներից մեկին»:
«Ոսկե Ծիրան» կինոփառատոնի տնօրեն Հարություն Խաչատրյանը խոսեց նաեւ առաջիկա փառատոնի մասին։ Նա տեղեկացրեց, որ 11-րդ փառատոնը նվիրվելու է կինոբեմադրիչ Սերգեյ Փարաջանովի 90-ամյա հոբելյանին: Սպասվում են հայտնի ռեժիսորներ եւ հյուրեր աշխարհի տարբեր երկրներից:
