նախընտրելի դարձնելՄոսկվայի կենտրոնի Կիեւյան կայարանում Ուկրաինայից վերադարձած երկու ակտիվիստի են ձերբակալել:
Ձերբակալվածներից մեկը Իլդար Դադինն է: Ըստ ականատեսների՝ ակտիվիստները Կիեւից գնացքով էին եկել, կայարանից դուրս եկել հրապարակ, որտեղ նրանց ձերբակալել էին չորս ոստիկան եւ տարել անհայտ ուղղությամբ, հայտնում է rosbalt.ru-ն՝ վկայակոչելով ovd.info-ն:
Ներկայումս ճշտվում են կատարվածի մանրամասները:
Ըստ որոշ տվյալների՝ ակտիվիստներին ձերբակալել են քրեական հետախուզության եւ ԱԱԾ-ի աշխատակիցները, նրանք գտնվում են «հերթապահ մասում», ակտիվիստներին փորձում են հարցաքննել:
Հիշեցնենք, որ Իլդար Դադինը ձերբակալվել էր 2013թ. հոկտեմբերին՝ չարտոնված ցույցի ժամանակ, նրա հետ ձերբակալվել էր եւս երեք մարդ: Ակտիվիստները քայլել էին Արբատով՝ վանկարկելով «Հիտլերը նույնպես գեյերից էր սկսել: Ո՛չ ռուսական ֆաշիզմին» պաստառով՝ բողոքելով գեյերին ծնողական իրավունքներից զրկելու օրինագծի դեմ: Ձերբակալությունը կոշտ բնույթ է կրել, ոստիկանության աշխատակիցները միանգամից չեն կարողացել Իլդարին նստեցնել հերթապահ մասի մեքենան:
