նախընտրելի դարձնելԱշոցքում կառուցվող դպրոցի նոր շենքը պատրաստ կլինի մայիսին, իսկ նախկին մասնաշենքը վերակառուցվում է որպես բազմաբնակարան շենք: Այս մասին այսօր՝ փետրվարի 26-ին Աշոցքի համայնք կատարած այցի ընթացքում ՀՀ փոխվարչապետ, տարածքային կառավարման նախարար Արմեն Գեւորգյանին հայտնեցին համայնքի ղեկավարները:
Տարածքային կառավարման նախարարության հասարակայնության հետ կապերի բաժնից հայտնում են. «Դպրոցը նախատեսված է 400 աշակերտի համար, ունենալու է կաթսայատուն եւ ջեռուցման համակարգ, երկու մարզադահլիճ` բացօթյա մարզահրապարակով եւ դպրոցի ներսում գործող դահլիճով: Ծրագրի ընդհանուր արժեքը 736 մլն դրամ է:
Համայնքի նախկին դպրոցի մասնաշենքերից մեկը ներկայումս վերակառուցվում է որպես բազմաբնակարան շենք, որտեղ պետք է տեղափոխվեն վթարային շենքերից մեկի ընտանիքները: Այդ ծրագրի իրականացման համար մարզի առաջնահերթ խնդիրների լուծման չորրորդ հրատապ ծրագրով հատկացվել էր 31 մլն դրամ:
Համայնքում Հայաստանի սոցիալական ներդրումների հիմնադրամի ծրագրով հիմնանորոգվել է մանկապարտեզը: Ներկայումս կատարվում են ներքին հարդարման աշխատանքներ, շենքն ամբողջությամբ պատրաստ կլինի մայիսին, ինչպես նաեւ կապահովվի անհրաժեշտ գույքով: Ծրագրի ընդհանուր արժեքը կկազմի շուրջ 74 մլն դրամ»:
