Անհայտ ակտիվիստները մեքսիկական Սինալոա նահանգի քաղաքներում  օրերս կալանավորված ամենափնտրվող հանցագործ, «Գաճաճ» մականվամբ հայտնի  Խոակին Գուսման Լոհերի ազատման քարոզչություն են սկսել:

Հզոր «Սինալոա» կարտելի պարագլուխ Գաճաճը նախորդ շաբաթ կալանավորվել էր Մասաթլան քաղաքում: Այժմ գտնվում է հատուկ ռեժիմի բանտում, նրա ինքնությունն ամբողջությամբ հաստատված է, հայտնում է «ՌԻԱ Նովոստին»՝ վկայակոչելով տեղի լրատվամիջոցները:

Սինալոայի մի քանի քաղաքների փողոցներում պաստառներ եւ թռուցիկներ են հայտնվել, որոնք քաղաքացիներին  կոչ են անում մասնակցել թմրաբարոնի ազատումը պահանջող երթերին: Ընդ որում՝ կազմակերպիչները Գուսմանին «Սինալոայի հերոս» են անվանում:

Գաճաճին բռնել էին փետրվարի 22-ին` Մեքսիկայի Մասաթլան քաղաքում: Գուսմանն ընդգրկված էր  ԱՄՆ-ի եւ Մեքսիկայի ամենափնտրվող  հանցագործների ցուցակում: 1993թ. Գաճաճը ձերբակալվել էր եւ դատապարտվել 20 տարվա ազատազրկման: Երբ Մեքսիկայի իշխանությունները վճռել էին նրան հանձնել ԱՄՆ-ին,  նա սկսել էր պատրաստվել բանտից փախուստին:  Գուսմանը մի քանի պահակների էր կաշառել եւ 2001 թ. հունվարի 19-ին փախել: