Սումգայիթում  հայերի 1988թ. ջարդերը ոչ միայն հայերին են վերաբերում, այլեւ ողջ մարդկությանը մարդատյացության քաղաքականության հետեւանք էր: Այս մասին փետրվարի 27-ի մամուլի ասուլիսում հայտարարել է «Ընդդեմ իրավական ամենաթողության» հասարակական կազմակերպության գործադիր տնօրեն, Հայաստանի նախկին օմբուդսմեն Լարիսա Ալավերդյանը:

Ըստ նրա` Սումգայիթում եւ Խոջալուում կատարված դեպքերը ցեղասպանություն են  սեփական ժողովրդի նկատմամբ, եւ այդ հանցագործությունները պետք է դատապարտվեն:  «Սակայն Հայաստանը գործում է միայն այն ժամանակ, երբ ադրբեջանցի պաշտոնյաներից մեկը արտասանում է «Հայաստան» բառը: Մինչդեռ, Ադրբեջանը հետեւողական քաղաքականություն է վարում եւ փորձում է հասնել Խոջալուում մտացածին «ցեղասպանության» ճանաչման, իսկ Հայաստանը չի քարոզում  Սումգայիթի իրական դեպքերը», - նշել է նախկին օմբուդսմենը:

Ըստ նրա` Հայաստանում պետք է ավելի ակտիվ գործեն եւ իրենք բարձրացնեն այդ հարցը, քանի որ «Եվրոպան, նավթային շահերից ելնելով, տրամադրված չէ պատասխանատվության կոչ անել  Ադրբեջանին, իսկ Ռուսաստանը, իր փոփոխվող շահերով,  մշտապես փոխում է տեսակետը»:

Լուսանկարը՝ Արսեն Սարգսյանի/ NEWS.am