նախընտրելի դարձնելՎաշինգտոնաբնակ հայերը փետրվարի 28—ին Ադրբեջանի դեսպանատան դիմաց բողոքի ցույց են անցկացրել՝ ադրբեջանի բռնությունների զոհերի հիշատակը հարգելու եւ Լեռնային Ղարաբաղի ազատատենչ ժողովրդին զորակցություն հայտնելու համար։ Այս մասին NEWS.am-ին հայտնել են Վաշինգտոնի Հայկական երիտասարդական ֆեդերացիայի մամուլի ծառայությունից։
Վաշինգտոնի Հայկական երիտասարդական ֆեդերացիայի եւ Սբ. Մարիամ եկեղեցու երիտասարդական կազմակերպության կողմից կազմակերպված ցույցը նվիրված էր Ադրբեջանի Սումգայիթ քաղաքում հայկական ջարդերի 26-ամյա տարելիցին, որոնք հող էին նախապատրաստել 1990թ. Բաքվի հարձակումների եւ հակահայկական բռնության համար, որը շարունակվում է առ այսօր: Ցուցարարները հատուկ ուշադրություն են հրավիրել 10 տարի առաջ Հունգարիայում ադրբեջանցի զիծառայող Ռամիլ Սաֆարովի կողմից հայ լեյտենանտ Գուրգեն Մարգարյանի դաժան սպանության փաստի վրա:
Ադրբեջանցի հակընդդեմ ցուցարարների փոքրաթիվ մի խումբ հեգնական դիտողություններ է արել, երբ հայկական Սբ. Մարիամ եկեղեցու հովիվ Հովսեփ Կարապետյանը հայ համայնքի անդամների ներկայությամբ աղոթել է ջարդերի զոհերի հիշատակի համար: Ոստիկանությունը ստիպված է եղել ադրբեջանցի սադրիչներից մեկին դուրս հրավիրել, երբ վերջինս մոտեցել էր հայ ցուցարարներին եւ ցուցանակով հարվածել նրանցից մեկին: Ադրբեջանցի ցուցարարներից շատերը ցույց են տվել «գորշ գայլերի» նշանը` համերաշխություն հայտնելով թուրք ուլտրաազգայնական եւ նեոֆաշիստական երիտասարդական կազմակերպությանը, որը մեղադրվում է քաղաքական սպանություններում:
Նշենք, որ 1988թ. փետրվարի 27-29-ին Ադրբեջանի ԽՍՀ-ի Սումգայիթ քաղաքը դարձել էր հայ բնակչության զանգվածային սպանդի թատերաբեմ: Սպանվել էին տասնյակ հայեր, հարյուրավորները ծանր վիրավորվել էին:
