նախընտրելի դարձնելՀայ-հոլանդական հարաբերությունները գյուղատնտեսության բնագավառում կհասցվեն զարգացման նոր մակարդակի: Այս մասին, այսօր՝ մարտի 5-ին, Հայաստանում Նիդերլանդների Թագավորության արտակարգ եւ լիազոր դեսպան Հանս Հորբախի հետ հանդիպման ժամանակ նշել է Հայաստանի գյուղատնտեսության նախարար Սերգո Կարապետյանը:
Գյուղնախարարության մամուլի ծառայությունից հայտնում են, որ դեսպան Հորբախը պատրաստակամություն է հայտնել ըստ ամենայնի աջակցել Հայաստանի եւ Նիդերլանդների Թագավորության գյուղատնտեսության նախարարությունների միջեւ կապերի սերտացմանը եւ նշել, որ հայ-հոլանդական հարաբերությունները գյուղատնտեսության բնագավառում զարգացման մեծ հեռանկար ու ներուժ ունեն:
Այնուհետեւ հյուրի խնդրանքով նախարարը հակիրճ ներկայացրել է ոլորտի ներկա վիճակը, զարգացման միտումներն ու ռազմավարական ծրագրերը: Առաջնահերթությունների շարքում նախարարը ներկայացրել է հողերի լիարժեք եւ արդյունավետ մշակման, գյուղատնտեսական կոոպերացիայի համակարգի ներդրման, սննդամթերքի անվտանգության կարողությունների ուժեղացման, անասնաբուծության եւ տոհմային գործի բարելավման, սերմարտադրության զարգացման հարցերը: Նա հատկապես կարեւորել է ջերմոցային տնտեսությունների զարգացման հոլանդական առաջավոր փորձի ուսումնասիրումն ու կիրառումը մեզանում, ակնկալելով հոլանդացի մասնագետների աջակցությունը: Հիմնավորելով հարցի անհրաժեշտությունը, նախարարը ցանկություն հայտնեց այս տարի Նիդեռլանդների Թագավորությունում կազմակերպել գյուղատնտեսության հարցերին նվիրված բիզնես-ֆորում:
Դեսպան Հորբախը նշել է, որ Հոլանդիայի կառավարությունը պատրաստակամ է շարունակել համագործակցությունը Հայաստանի հետ: 2014 թվականի ամռանը Նիդերլանդների Էկոնոմիկայի նախարարությունն սկսելու է ֆինանսավորել «Մասնավոր սեկտորի նախաձեռնություն» թեմայով նոր ծրագրեր: Ուստի եւ պատրաստ է այդ նպատակով քննարկել ագրոպարենային ոլորտին վերաբերող ներկայացված ցանկացած ծրագիր, նշել է նա:
Հանդիպման ընթացքում նախարար Սերգո Կարապետյանն անդրադարձել է նաեւ Մաքսային միությանը Հայաստանի անդամակցելուն, նշելով. «Այդ հանգամանքը չի անդրադառնում Եվրամիության հետ մեր հարաբերությունների հեռանկարին, վերջինիս հետ մեր ծրագրերը շարունակվում են եւ պիտի աշխատենք ավելի խորացնել ու ընդլայնել դրանք»:
