նախընտրելի դարձնելՈւկրաինայի նախկին վարչապետ, «Բատկիվշչինա» կուսակցության առաջնորդ Յուլյա Տիմոշենկոն Արեւմուտքին կոչ է արել չբացառել Ռուսաստանի դեմ ռազմական ուժի կիրառումը: Ըստ նրա՝ հակառակ պարագայում Մոսկվան կարող է վերահսկողության տակ վերցնել Ուկրաինայի մնացած մասը եւ ապակայունացնել մայրցամաքի իրավիճակը:
Երբ Ղրիմի խորհրդարանը ՌԴ-ին միանալուն հավանություն է տվել, Տիմոշենկոն նախազգուշացրել է, որ Վլադիմիր Պուտինը կօգտվի Արեւմուտքի ցանկացած թուլությունից:
«Եթե մենք Ռուսաստանին թույլ տանք մարտի 16-ին Ղրիմում հանրաքվե անցկացնել, կկորցնենք Ուկրաինան եւ աշխարհի կայունությունը», – Եվրախորհրդարանի խոշորագույն կուսակցության՝ ԵԺԿ-ի նիստում հայտարարել է Տիմոշենկոն:
«Եթե Ուկրաինային ժամանակին իրական աջակցություն չհատկացվի, անգործության հետեւանքները դժվար կլինի կանխատեսել»,- ասել է նա:
Ըստ Տիմոշենկոյի՝ Ուկրաինան չափազանց թույլ է Ռուսաստանին միայնակ դիմակայելու համար, եւ Ռուսաստանի դեմ ռազմական ուժի կիրառումը պետք չէ բացառել:
«Ռուսական ագրեսիան կանգնեցնելը միայն Ուկրաինայում ազատության հասնելու հարց չէ: Մենք ողջ տարածաշրջանի ազատության մասին ենք խոսում: Մենք Եվրոպայում պատերազմի եւ խաղաղության մասին ենք խոսում», – հայտարարել է նա:
Տիմոշենկոն ԱՄՆ-ին եւ Մեծ Բրիտանիային կոչ է արել որպես 1994թ. Բուդապեշտի՝ Ուկրաինայի տարածքային ամբողջականությունը երաշխավորող հուշագիր ստորագրած երկրներ, միջնորդ հանդես գալ Մոսկվայի հետ բանակցություններում:
