նախընտրելի դարձնելԳերմանիայի իշխանությունները ազատ են արձակել երեք մարդու, որոնց կասկածում էին նացիստներին սատարելու մեջ: Մարտի 6-ին ձերբակալվածներից վերջինը ազատ է արձակվել 100 հազար եվրո գրավի դիմաց: Նրանից վերցրել են նաեւ անձնագիրը, եւ նա պարբերաբար պետք է ներկայանա ու գրանցվի ոստիկանությունում, հայտնում է lenta.ru-ն՝ վկայակոչելով dpa-ն:
Անցյալ շաբաթ կալանքից ազատ էին արձակվել Օսվենցիմի ենթադրյալ երեք հսկիչներից երկուսը: Թեեւ կալանավորներն ազատության մեջ են, շարունակվում է նրանց նկատմամբ քննությունը:
Հիշեցնենք, որ երեք կասկածյալները կալանավորվել էին փետրվարի վերջին՝ Բադեն Վյուրտեմբերգի դաշնային տարածքում: Տարիքի (88- 94 տարեկան) եւ առողջական վատ վիճակի պատճառով նրանք տեղափոխվել էին բանտային հիվանդանոց:
Նշենք, որ Գերմանիայի իշխանությունները նացիստներին նախկին աջակիցների նկատմամբ նոր քննություն էին սկսել 2011թ. դատավճռից հետո, երբ ճանաչվել էր Սոբիբոր համակենտրոնացման ճամբարի պահակ Ջոն Դեմյանյուկի մեղքը: Մինչ այդ իրավապահ մարմինները առաջնորդվում էին Գերագույն դատարանի 1969թ. վճռով, ըստ որի՝ նացիստներին սատարելու գործում մեղավոր ճանաչվելու համար պետք էր ապացուցել կասկածյալների անհատական, անմիջական մասնակցությունը սպանություններին: Շատ դեպքերում դա անելն անհնար էր: Իսկ այժմ նացիստներին աջակից է համարվում նա, ով նպաստել է նրանց աշխատանքին:
