նախընտրելի դարձնելԳյուղացիները կրկին մատչելի գներով ձեռք են բերելու սերմացու, պարարտանյութ ու դիզելային վառելանյութ: Այս մասին այսօր՝ մարտի 7-ին Լոռիի մարզ կատարած այցի ժամանակ ասել է ՀՀ գյուղատնտեսության նախարար Սերգո Կարապետյանը:
Նախարարության մամուլի ծառայությունից հայտնում են. «Սպիտակի թռչնաբուծական ֆաբրիկայում նախարարը մարզպետ Արթուր Նալբանդյանի ուղեկցությամբ ծանոթացել է ժամանակակից գերմանական սարքավորումներով կառուցվող ձեռնարկության շինարարության ընթացքին: Նորակառույց 8 նոր թռչնանոցներից 4-ում սարքավորումների տեղակայման աշխատանքներն արդեն ավարտված են, մյուսների տեխնիկական հանդերձավորումը կսկսվի մոտ օրերս: Տարեկան երեք հազար տոննա թռչնամսի արտադրական հզորություն ունեցող թռչնաֆաբրիկան կապահովի 200 նոր աշխատատեղ մարզի բնակչության համար:
Նախարարի այցելության հաջորդ կանգառը բազմաբնույթ արտադրական գործունեություն ունեցող Վանաձորի «Թալգրիգ» ՍՊԸ-ն էր, որն զբաղվում է ցորենի ներմուծմամբ, ալյուրի, մակարոնեղենի, հրուշակեղենի, լավաշի արտադրությամբ, մանրածախ եւ մեծածախ առեւտրով: Ընկերության արտադրական հզորությունների աճը հնարավորություն կտա մինչեւ տարեվերջ աշխատողների թիվը 90-ից հասցնել 170-ի:
Օրվա երկրորդ կեսին Վանաձորի Աբելյանի անվան թատրոնում նախարարը մարզպետի հետ մասնակցել է համայնքի ղեկավարների, ֆերմերների, անտառային տնտեսության աշխատողների, մարզի ագրարային ոլորտին առնչվող մյուս մասնագետների հետ հանդիպում-խորհրդակցությանը: Իր ելույթում նա ամփոփիչ անդրադարձ է կատարել 2013 թվականին, հաջողված ու արդյունավետ համարել այն հանրապետության եւ Լոռու մարզի համար ,խոսել պետական օժանդակման այն ծրագրերի մասին, որոնց, ինչպես նաեւ մեր գյուղացիների ջանադիր աշխատանքի շնորհիվ է հնարավոր եղել ապահովել նման արդյունքները:
Նա նշել է նաեւ, որ գյուղացին կրկին մատչելի գներով ձեռք է բերելու սերմացու, պարարտանյութ ու դիզելային վառելանյութ, ինչը հնարավոր է դարձնելու կրկնել նախորդ տարվա ձեռքբերումները»:
