Ազգային ժողովի ՀՀԿ խմբակցության պատգամավոր Մարգարիտ Եսայանն այսօր` մարտի 8-ին կանանց միջազգային տոնին շնորհավորում է նախ եւ առաջ տղամարդկանց:

«Նախ ցանկանում եմ շնորհավորել տղամարդկանց եւ մաղթել արժանապատիվ աշխատանք, արժանապատիվ աշխատավարձ, որպեսզի կարողանան ըստ արժանվույն պահել իրենց կանանց: Իսկ հայ կանանց մաղթում եմ իմաստություն, կանացի խորամանկություն եւ կանացիություն` ընտրելու ճիշտ տղամարդ»,- այսօր` մարտի 8-ին, լրագրողների հետ հանդիպման ժամանակ ասաց Մարգարիտ Եսայանը:

Խոսելով կնոջ դերի մասին` կին պատգամավորն ընդգծեց, որ խորհրդարանում առաջին անգամ այսքան կանայք են աշխատում:

«Մեր 14 կին պատգամավորներն աշխատում են շատ համերաշխ, առանց նախանձի, ակտիվ դիրքորոշում ունեն բոլոր հարցերի վերաբերյալ եւ միշտ ակտիվ հայտնում են իրենց կարծիքները»,- նշեց ՀՀԿ-ական պատգամավորը:

Մարգարիտ Եսայանի խոսքը ժպիտով ընդհատեց հանդիպմանը ներկա Ազգային ժողովի ՕԵԿ խմբակցության ղեկավար Հեղինե Բիշարյանը. «Կանխում եք այն հարցը, որ լրագրողները կտան` կին պատգամավորների միջեւ խնդիրներ կան, թե ոչ»:

Քաղաքականության մեջ կնոջ դերին նվիրված ասուլիսին Մարգարիտ Եսայանը ներկա գտնվող կին լրագրողներին նվիրեց իր հեղինակած գրքերը:

Լուսանկարը՝  Արսեն Սարգսյանի/NEWS.am