Արագածոտնի մարզի Կարբի եւ Օհանավան համայնքների ոռոգման համակարգի ուսումնասիրման նպատակով ստեղծված հանձնաժողովը  դեռ շարունակում է  աշխատանքները եւ դրանց շրջանակում հանդիպումներ է նախատեսում նաեւ համայնքների բնակիչների հետ: Այդ մասին NEWS.am-ին հայտնեցին տարածքային կառավարման նախարարության հասարակայնության հետ կապերի բաժնից՝ մեկնաբանելով գյուղերի բնակիչների բողոքի ակցիաները:

Հանձնաժողովի ուսումնասիրությունների արդյունքներն ու առաջարկությունները սահմանված ժամկետներում կներկայացվեն կառավարություն:

Իսկ  տարածված տեղեկությունները, թե այսօր առավոտյան  բնակիչների հետ  պետք է հանդիպեր  ՀՀ փոխվարչապետ, տարածքային կառավարման նախարար Արմեն Գեւորգյանը,  իրականությանը չեն համապատասխանում, քանի որ նման հանդիպման հարց չի քննարկվել, եւ փոխվարչապետն  այսօր Մոսկվայում մասնակցում է ԱՊՀ տնտեսական խորհրդի նիստի  աշխատանքներին:

Միաժամանակ  խնդիրն ուսումնասիրող հանձնաժողովն ափսոսանք է հայտնում  տարաբնույթ շահարկումների եւ ապատեղեկատվության տարածման առնչությամբ, որոնք թյուրիմացության մեջ են գցում համայնքների բնակիչներին:

Նշենք, որ Արագաշոտնի մարզի յոթ գյուղերի բնակիչներ այսօր բողոքի ակցիա են արել ճանապարհին՝ բողոքելով կառուցվող ՀԷԿ-ի դեմ:

Փոխվարչապետը չեկավ, գյուղացիները կրկին փակում են Երեւան-Ապարան ավտոմայրուղին