ՆախընտրելիՀայաստանում նախատեսվում է անցկացնել հեղինակային պոեզիայի առաջին համացանցային փառատոնը, որը նախաձեռնել է «ԲԵՄ» ստեղծագործական միավորումը:
NEWS.am-ի թղթակիցը զրուցել է փառատոնի հիմնադիր Նիկոլ Գալանտերյանի անվան բեմարվեստի համալսարանի ռեկտոր Արմեն Նալբանդյանի հետ, որը պատմել է մրցույթի մանրամասների մասին:
Պարոն Նալբանդյան, ո՞րն է նման փառատոնի անցկացման նպատակը:
Փառատոնի հիմնական նպատակը հասարակությանը պոեզիայի շուրջ համախմբելն է, ինչպես նաև ստեղծագործական հակումներ ունեցող անձանց ոգեշնչելն ու ընթերցողների հետ անմիջական կապ ստեղծելը:
Ի՞նչ անվանակարգեր կան փառատոնում:
Մրցանակ լավագույն հումանիստական բովանդակության համար, լավագույն հայրենասիրական շարք, լավագույն առակագիր, մրցանակ պատկերավոր մտածողության համար, և այլն։ Լավագույն գործերն իրենք իսկ կհուշեն անվանակարգերը:
Ի՞նչ պայմաններ են անհրաժեշտ փառատոնին մասնակցելու համար:
Փառատոնին կարող են մասնակցել այն ստեղծագործողները, ովքեր կներկայացնեն արձակ կամ չափածո ստեղծագործություններ: Տարիքային սահմանափակում չկա։ Յուրաքանչյուր մասնակից խմբում կարող է տեղադրել առավելագույնը հինգ ստեղծագործություն, որոնք կհաստատվեն խմբի ադմինի կողմից։ Մասնակիցները պետք է ստեղծագործության հետ զուգահեռ ներկայացնեն իրենց կենսագրական տվյալները և մեկ լուսանկար: Ստեղծագործությունների զետեղման վերջնաժամկետն է մարտի 15-ը: Մրցույթը կանցկացվի երեք փուլով` ստեղծագործությունների ներկայացում փառատոնի ֆեյսբուքյան խմբում , փառատոնի ժյուրիի կողմից անվանակարգերի շնորհում, շքահանդես-պարգեւատրում: Կլինի նաև «Ֆեյսբուքահայության համակրանք» անվանակարգ, որին կարժանանա ամենից շատ «լայք» հավաքած ստեղծագործությունը: Պոեզիայի փառատոնի ավարտին լույս կընծայվի տարեգիրք, որում տեղ կգտնեն ժյուրիի կողմից անվանակարգերի արժանացած ստեղծագործությունները:
Ինչո՞ւ որոշվեց փառատոնն անցկացնել համացանցային ֆորմատով:
Համացանցը տալիս է անմիջական հնարավորություն ավելի թափանցիկ լինել հանրության առջև, և հանրությունն էլ իր հերթին հանդիսանում է «դե ֆակտո» ժյուրի, քանի որ ունենք նաև «Ֆեյսբուքահայության համակրանք» մրցանակ:
