նախընտրելի դարձնելՄալազիայի վարչապետ Նաջիբ Ռազակը դիմել է Ղրղըզստանի նախագահ Ալմազբեկ Ատամբաեւին՝ Malaysia Airlines-ի Boeing 777 օդանավի որոնման աշխատանքներին մասնակցելու խնդրանքով: Խնդրանքը հնչել է հեռախոսազրույցի ընթացքում, հայտնում է պետության ղեկավարի մամուլի ծառայությունը:
«Խնդրվել է տրամադրել ողջ տեղեկատվությունը, որը կարող է օգտագործվել օդանավի տեղաշարժման երթուղին որոշելիս», - ասված է հաղորդագրությունում:
Մալազիայի վարչապետի խոսքով՝ «հնարավոր երթուղիներից մեկը Ղրղըզստանի օդային տարածքով անցնելու տարբերակն է»:
Ատամբաեւը Մալազիային օգնելու պատրաստակամություն է հայտնել: Նա վստահեցրել է, որ Տրանսպորտի եւ կապի նախարարությանն առընթեր Քաղաքացիական ավիացիայի գործակալությունը, ինչպես նաեւ հանրապետության պաշտպանության նախարարության օդային պաշտպանության ուժերը «մալազիացի գործընկերներին կտրամադրեն անհրաժեշտ ողջ տեղեկությունը», հայտնում է ԻՏԱՌ-ՏԱՍՍ-ը:
Պետության ղեկավարը նշել է, որ Ղրղըզստանի ժողովուրդը «ցավում է անհետացած Boeing 777-ի անձնակազմի եւ ուղեւորների հարազատների հետ եւ հուսով է օդանավի որոնումների դրական արդյունքներին»:
Հիշեցնենք, որ 227 ուղեւորներով եւ անձնակազմի 12 անդամներով Boeing 777-200 օդանավը, որը Կուալա Լումպուրից թռչում էր Պեկին, մարտի 7-ի լույս 8-ի գիշերն անհետացել էր ռադարների էկրաններից: Օդանավի գտնվելու վայրը մինչ այժմ հայտնի չէ:
Վարկածների շարքում նշվում է օդանավի ընկնելը, ինչպես նաեւ հնարավոր առեւանգումը:
