Համաշխարհային բանկի խմբի անդամ Միջազգային ֆինանսական կորպորացիան (IFC) կաջակցի  «Յունիբանկ» ՓԲԸ-ին ներկրող եւ արտահանող ՓՄՁ-ների վարկավորման ծրագրի ընդլայնման,  ֆինանսական ռեսուրսների հասանելիության բարձարցման, առեւտրի խթանման եւ  հավելյալ աշխատատեղերի ստեղծման գործընթացներում:

IFC-ին Յունիբանկին կհատկացնի 5 մլն ԱՄՆ դոլար սահմանաչափով վերականգնվող վարկային գիծ, որը կուղղվի   առեւտրի խթանմանն ու փոքր եւ միջին ձեռնարկությունների շրջանառու միջոցների համալրմանը:

«Լրացուցիչ վարկային միջոցները հնարավորություն կտան բանկին վարկառուներին առաջարկել ավելի մատչելի պայմաններ եւ  միջոցներ՝ հասանելի դարձնել ավելի մեծ թվով ձեռնարկատերերի համար: Այդ կերպ մենք ձգտում ենք  դառնալ բիզնեսի համար առավել շահավետ գործընկեր եւ նպաստել դրա զարգացմանը, հատկապես շեշտը դնելով ՓՄՁ-ների առաջխաղացման վրա», - ասում է Յունիբանկի Վարչության նախագահ Վարդան Աթայանը: 

Հիշեցնենք, որ 2013թ.-ի դեկտեմբերին IFC-ն եւ Առեւտրի եւ զարգացման Սեւծովյան բանկը (BSTDB) Յունիբանկի հետ կնքեցին համագործակցության պայմանագիր, որի շրջանակներում բանկին կհատկացվի 10 մլն ԱՄՆ դոլար, որն ուղղվելու է ՓՄՁ-ների երկարաժամկետ վարկավորմանը: ՓՄՁ-ների վարկավորման եւ ռիսկերի կառավարման գործընթացի բարելավման նպատակով IFC-ն Յունիբանկին մատուցում է նաեւ խորհրդատվական ծառայություններ ռկսերի կառավարման եւ ՓՄՁ-ների վարկավորման ուղղությամբ:

«Իրենց ամենօրյա գործարքներն իրականացնելու համար նման կարճաժամկետ ֆինանսական միջոցներից օգտվելու հնարավորությունները ներկրող եւ արտահանող ձեռնարկությունների համար հաճախ սահմանափակ են: Ծրագրի նպատակն է  աջակցել տեղական ընկերություններին եւ դրական ազդեցություն ունենալ ընդհանուր տնտեսության վրա»,- նշեց  IFC-ի Հարավային Կովկասի տարածաշրջանի ղեկավար Թոմաս Լյուբեքը:

Հայաստանը IFC անդամ եւ բաժնետեր է  դարձել 1995թ.:  IFC-ն 287 մլն դոլար է ներդրել   ֆինանսական, արտադրության, լեռնահանքային արդյունաբերության ոլորտների 48 ծրագրերում: