Երեւանի ավագանու «Բարեւ Երեւան» խմբակցության անդամ Անահիտ Բախշյանը «Կամելոտ» ռեստորանում մինչեւ ուշ գիշեր հնչող բարձր երաժշտության համար դիմել է ՀՀ ոստիկանապետ Վլադիմիր Գասպարյանին:

«Հարգելի պարոն Գասպարյան, վրդովմունքով  ինձ է դիմել Երեւանի Մաշտոցի պողոտայի 31 շենքի 3-րդ բնակարանի բնակչուհի  76-ամյա Ստելլա Առուստամյանն  այն մասին, որ իր բնակարանի ներքեւի հարկում գործող «Կամելոտ»  ռեստորանում մինչեւ գիշերվա 2-ը հնչում է  ինչպես «կենդանի»  այնպես էլ մագնիտոֆոնային երաժշտություն: Դիմումին կից ներկայացրել է տարիներ շարունակ տարբեր ատյաններին   ներկայացրած իր դիմում բողոքները, ընդհուպ մինչեւ ՀՀ վարչապետ, սակայն, ինչպես ինքն է ներկայացնում, Ձայն բարբառո անապատի: Տիկին Ստելլայի ներկայացրած փաստաթղթերում առկա են նաեւ ոստիկանությանն ուղղված դիմումներ եւ պատասխաններ, որոնք վկայում են այն մասին, որ ոչ մի պատիժ չի ազդում ռեստորանի  տնօրինության վրա, որովհետեւ, ինչպես ներկայացնում է տիկին Ստելլան, ռեստորանի իրական տերը բարձր պաշտոնյա է /սպորտի եւ երիտասարդության փոխնախարար/: Նշեմ, որ  ըստ Երեւանի փոխքաղաքապետի 25.11.2013 թվակիր գրության, քաղաքապետարանի կողմից ռեստորանին ժամը 23.00-ից հետո աշխատելու թույլտվություն չի տրվել, իսկ ՀՀ առողջապահական պետական տեսչության ստուգումների արդյունքներով, աղմուկը նորմայի սահմաններում է: Կարծում  եմ,  շատ լավ եք  պատկերացնում  76-ամյա մարդու անաղմուկ  գիշերային հանգիստ ունենալու ամենօրյա պահանջը, որը խաթարվում է ամեն գիշեր:  Խնդրում եմ  ոստիկանության իրավասությունների շրջանակում ձեռնարկել հնարավոր միջոցները կարգի հրավիրելու «Կամելոտ»  ռեստորանի տնօրինությանն ու ապահովել 76-ամյա թոշակառու կնոջն  իր բնակարանում անաղմուկ  ապրելու պայմաններ»,- ասվում է Բախշյանի հայտարարության մեջ:

Լուսանկարը՝  Արսեն Սարգսյանի/NEWS.am