Սյունիքի մարզի Սիսիան քաղաքում, այսօր՝ մարտի 18-ին, մեկնարկել են «Սիսիանը` 2014 թ. երիտասարդական մայրաքաղաք» միջոցառումները. մեկնարկի արարողությանը ներկա է եղել Հայաստանի փոխվարչապետ, տարածքային կառավարման նախարար Արմեն Գեւորգյանը:

ՏԿՆ մամուլի ծառայությունից հայտնում են, որ ողջունելով ՀՀ սպորտի եւ երիտասարդության հարցերի նախարարության նախաձեռնությունը` փոխվարչապետը հույս է հայտնել, որ այն լավ ավանդույթի հիմք կդնի եւ կնպաստի մարզային քաղաքներում երիտասարդների համար նոր հնարավորությունների ստեղծմանը:  

Փոխվարչապետը  շնորհավորել է Սիսանի բնակչությանն ու, հատկապես, երիտասարդներին, համոզմունք հայտնելով, որ տարվա ընթացքում իրականացվելիք  բազմաթիվ ծրագրերն ու միջոցառումները  քաղաքն իսկապես կդարձնեն երիտասարդության կենտրոն ու նաեւ օգտակար կլինեն  տեղաբնակ  երիտասարդների համար: Ծրագրի հաջողությունը, ըստ նրա, կնպաստի, որպեսզի հետագա տարիներին ավելի շատ քաղաքներ մրցեն այդ տիտղոսը նվաճելու համար: 

ՀՀ սպորտի եւ երիտասարդության հարցերի նախարարության կողմից  2013թ. առաջին անգամ  անցկացված  «Երիտասարդական մայրաքաղաք» մրցույթում հաղթող էր ճանաչվել Սիսիանը: Մարզային քաղաքները երիտասարդական մայրաքաղաք հռչակելու նախաձեռնության նպատակը տեղում ողջ տարվա ընթացքում երիտասարդական ծրագրերով նախատեսած բազմաթիվ միջոցառումների կազմակերպումն ու իրականացումն է, ինչը կնպաստի քաղաքներում երիտասարդական կյանքի աշխուժացմանը: