Չի բացառվում, որ Հայաստանում այնպիսի իրավիճակ ստեղծվի, որտեղ երկիրը ունենա իշխանություն եւ այլընտրանք, բայց չունենա ընդդիմություն: Այս մասին մարտի 24-ի մամուլի ասուլիսում հայտարարել է Ազգային ժողովի ՀՀԿ-ական պատգամավոր, ԱԺ-ի ֆինանսաբյուջետային հարցերով մշտական հանձնաժողովի նախագահ Գագիկ Մինասյանը:

Ըստ նրա` ընդդիմադիր դաշտի համախմբումը նորություն չէ: «Ես ողջունում եմ մեր երկրում ցանկացած քաղաքական համախմբում` լինի այն ընդդիմադիր, թե իշխանական ճամբարում, այն միանգամայն օգտակար է», - նշել  է Մինասյանը: Ըստ նրա` տվյալ դեպքում  համախմբում է տեղի ունենում առանց որեւէ  պարտադրանքի: «Կարծում եմ, որ որոշ ժամանակ անց մենք ավելի բարձր մակարդակի համախմբվածություն կունենանք: Այդպիսի հանգամանքներում ենթադրում եմ, որ ընդդիմադիր քաղաքական ուժերը ընդդիմադիր դաշտ կբերեն այլընտրանքային քաղաքական ուժ, կամ էլ այլընտրանքային քաղաքական ուժը ընդդիմադիր կուսակցություններին  այլընտրանքային քաղաքական դաշտ կբերի», - կարծիք է հայտնել պատգամավորը` հիշեցնելով, որ այլընտրանքային ուժի ` ԲՀԿ-ի ղեկավարությունը բազմիցս հայտարարել է, որ իրեն երբեք ընդդիմության դերում չի ներկայացրել:

Լուսանկարը` Արսեն Սարգսյանի/ NEWS.am