նախընտրելի դարձնելԱզատամարտի վետերանների միությունը հրավիրել է արտահերթ խորհրդակցություն, կապված` Սիրիայի Քեսաբ համայնքում տեղի ունեցած վերջին իրադարձությունների հետ:
Նրանց տարածած հաղորդագրության մեջ ասվում է.
«Ազատամարտի վետերանների միությունը իր խորը զայրույթն ու ցասումն է արտահայտել կատարվածի առնչությամբ եւ խստորեն դատապարտել Քեսաբի խաղաղ բնակչության նկատմամբ ծայրահեղականների իրականացրած ահաբեկչական գործողությունները:
Թուրքական զինուժի գործողությունների պատճառով տեղաբնակ հայությունը տարհանվել է, ավերվել եւ հրկիզվել է նրանց բնակատեղիները:
Ցեղասպանությունից մոտ մեկ դար անց մազապուրծ եղած հայերը, որոնց մի մասը 1915թ հետո ձեւավորվել էր Սիրիայում` կրկին բռնել է գաղթի ճանապարհը:
Ազատամարտի վետերանների միությունը իր զորակցությունն է հայտնում Սիրիայում գտնվող հայ բնակչությանը եւ թուրքական իշխանություններից պահանջում անհապաղ դադարեցնել հայազգի բնակչության նկատմամբ անմարդկային ոտնձգությունները.
«Կոչ ենք անում հայկական սփյուռքին համախմբվել եւ բողոքի ակցիաներ կազմակերպել ի նշան թուրքական զինուժի գործողությունների.
Կոչ ենք անում միջազգային կազմակերպություններին դատապարտել տեղի ունեցածը եւ ձեռնարկել համապատասխան միջոցներ խաղաղ բնակչության տարհանման, նրանց բնակատեղիների ոչնչացման ուղղությամբ»:
